ALEATËT E TRUMP KUNDËR COMEY, DISKREDITOJNË LIBRIN E ISH-SHEFIT TË FBI

0
163

 

Aleatët e presidentit amerikan Donald Trump kanë nisur një fushatë diskreditimi ndaj ish-shefit të FBI James Comey.  Javën e ardhshme, Comey do të publikojë një libër me kujtime, që pritet të paraqesë një portret aspak të mirë të zotit Trump, i cili e shkarkoi nga detyra një vit më parë.  Kështu, republikanët kanë hapur një faqe online ku ata e etiketojnë ish-zyrtarin e lartë të zbatimit të ligjit në vend, si “Gënjeshtari Comey”. Sipas disa fragmenteve të shkëputura nga ky libër, të cilat janë publikuar në të përditshmen amerikane The Washington Post, Comey krahason presidentin Trump me një kryetar të një organizate mafioze. Ish-drejtori i FBI shkruan se bisedat dhe ndërveprimet me kreun e shtetit, i kujtojnë çastet e para të karrierës së tij si prokuror kundër bandave.  Comey thekson se ai kurrë nuk e ka parë presidentin të qeshë dhe këtë e konsideron si një shenjë të “pasigurisë së thellë të Donald Trump dhe paaftësisë së tij për të qenë i cënueshëm, gjë që në fund e bën atë një udhëheqës të trishtë dhe një president të frikshëm”. Për promovimin e librit “Një besnikëri më e lartë: E vërteta, Gënjeshtrat dhe Udhëheqja”, zoti Comey ka parashikuar një sërë intervistash me media të ndryshme. Ndërkohë, porositë paraprake online të librit e kanë kthyer atë në një best-seller në faqen e Amazon.