I qetë dhe i shoqëruar nga avokati i tij, Maksim Haxhia është paraqitur para pak minutash ish-ministri i Brendshëm Saimir Tahiri në gjykatën e Krimeve të Rënda, i thirrur nga ky organ për ta njohur me vendimin e bllokimit të pasaportës.
Tahiri u thirr në seancë ku do të njihet nga afër me vendimin e gjykatës për bllokimin e pasaportës dhe ID, duke mos e lejuar atë të lëvizjë jashtë shtetit, pas kërkesës së Prokurorisë së Krimeve të Rënda.
Gjykatësja Luljana Baku do ta njohe ish-ministrin me vendimin dhe do ta marrë atë në pyetje, ndërsa është i akuzuar nga prokuroria se dyshohet të ketë lidhje me grupin kriminal të Habilajve.
Nga ana tjetër, Tahiri ka insistuar vazhdimisht se nuk ka asnjë lidhje me bandën e Habilajve, ndërsa pritet të kundërshtojë masën shtrënguese të gjykatës për bllokimin e pasaportës dhe privimin e tij për të dalë jashtë vendit. 
