Korçë 34-vjeçari dhunohet në Komisariat, policia e mohon

0
218

Një 34-vjeçar akuzon Policinë e Korçës se e ka dhunuar atë gjatë shoqërimit si të dyshuar për një sërë vjedhjes. Mariglen Muka nga fshati Kamenicë rrëfen ndodhinë. “U paraqita në Komisariatin e Korçës rreth orës 9 të mëngjesit, sepse më telefonoi inspektori i zonës. Mendova se më kërkonin për dokumentat e makinës. Më shoqëruan në një prej zyrave të Komisariatit, ku më morën në pyetje për disa vjedhje në fshat dhe kërcënimin nëpërmjet telefonit”, thotë ai. 34-vjeçari thotë se është i pafajshëm dhe kur ka mohuar akuzat para policisë është fyer e goditur me grushta. “Kur mohova akuzat, polici që më mori në pyetje më fyu dhe më pas më goditi me grushta dhe shkelma në kokë dhe pjesën e barkut. Nga goditjet humba ndjenjat. Pasi u përmenda më çuan në një tjetër zyrë dhe erdhi një mjek më bëri një qetësues sepse kisha shqetësime”, rrëfen Muka. Ai është lënë i lirë rreth orës 15:00 dhe më pas familjarët e kanë shoqëruar për në spital. 34-vjeçari thotë se do të denoncojë policin që e ka dhunuar. “Do të bëj denoncim për policin që më dhunoi. Kur u dhunova prezent ishte edhe inspektori i zonës, por ai nuk më goditi”, deklaron ai. Ndërkohë, Shërbimi për Çështjet e Brendshme dhe Ankesat ka filluar verifikimet për policin që dhunoi 34-vjeçarin dhe për inspektorin e zonës. Burime konfidenciale nga Policia e Korçës thonë se dy efektivët kanë mohuar të kenë ushtruar dhunë mbi 34-vjeçarin, edhe pse në fytyrën e tij pasojat e janë të dukshme.