Letoni, arrestohet për korrupsion Guvernatori i Bankës Qendrore

0
120

Policia e Letonisë ka arrestuar guvernatorin e bankës qëndrore, i cili akuzohet për korrupsion dhe lidhje me persona që janë afër programit bërthamorë të Koresë së Veriut. Megjithatë ai mohon akuzat. Dridhet sistemi financiar i një prej vendeve të Eurozonës. Guvernatori i Bankës Qëndrore të Letonisë, Ilmars Rimsevics, anëtar i bordit të Bankës Qëndrore Europiane, është arrestuar pasi është marrë në pyetje për 8 orë nga agjentët e antikorrupsionit në kryeqytetin Riga. Ndërsa më herët policia e Letonisë kontrolluan zyrën dhe shtëpinë e kryebankierit, i cili nuk gjendej në vend por që u rikthye më pas. 52-vjeçari Rimsevics, që prej 2001 është Guvernator i Bankës Qëndrore dhe prej 2014-ës, vit kur Letonia hyri në zonën euro, është anëtar bordi i BQE-së. kryeministri Maris Kucinskis, ka konfirmuar besueshmëri totale tek policia dhe shton se nuk ka sinjale për rrezik në sistemin financiar të Letonisë. Shefi i qeverisë njofton se sëbashku me ministren e financave Dana Reizniece-Ozola, po ndjek rastin e Guvernatorit të bankës qëndrore. Shefja e financave ka paralajmëruar se sistemi financiar i Letonisë po pëson një goditje tragjike nga hetimet. “Çdo ditë që kalon përkeqësohet më tej situata me qëndrimin e Rimsevics në drejtim të bankës qëndrore”, thotë ajo. Ndërkohë, për avokatin mbrojtës arrestimi i guvernatorit është qartësisht i paligjshëm. Për Letoninë bëhet fjalë për një goditje të re. Në ditët e kaluara Departamenti i Thesarit Amerikan i ndaloi bankave të veta të kryejnë transaksione me bankën më të madhe të Letonisë, Ablv, që akuzohet se ka institucionalizuar pastrimin e parave dhe se ka mbajtur raporte me subjekte që lidhen me zhvillimin e programit raketor të Koresë së Veriut.