Humbja në shtëpi nga GenoVa duket se ka shkaktuar tensione te Lacio. Pas ndeshjes thuhet të ketë pasur një konfrontim fizik të ashpër mes Felipe Anderson dhe Simone Inzaghit. Trajneri e ka qortuar brazilianin për kontributin aspak të çmuar që dha, teksa kishte nisur grumbullimin stërvitor, por ky i fundit duket se nuk i ka mirëpritur kritikat dhe aty ka nisur edhe sherri. Të paktën ky është versioni i publikuar nga mediet, ndërsa klubi e ka mohuar këtë çështje përmes zëdhënësit Arturo Diaconale. Sipas këtij të fundit “pati vetëm një konfrontim civil”, megjithatë fakt është se në seancën stërvitore të pasdites, futbollisti brazilian nuk ka qenë i pranishëm. “Premium Sport” ka zbuluar se, kritikave të Inzaghit pas ndeshjes, Anderson iu është përgjigjur me një shprehje rrufè: Gjithmonë me mua e kap ti! Sherrin që nisi duket se e ka shuar një tjetër brazilian, Lucas Leiva, që me eksperiencën e tij ka mundur të rikthejë qetësinë mes trajnerit dhe shokut të skuadrës. E ardhmja e brazilianit tashmë vihet në diskutim dhe me shumë mundësi do të jetë larg Romës.