Shkencëtarët indianë kanë arritur ta gjejnë lokacionin e sondës së nisur drejt Hënës pasi më parë e kishin humbur kontaktin me të. Ata kanë thënë se sonda tashmë është lëshuar në sipërfaqen e Hënës.
Shefi i Organizatës Indiane për Hulumtime në Hapësirë tha se lokacioni i sondës është përcaktuar përmes kamerave nga një fluturake tjetër. “Sigurisht që kjo ka qenë një ulje e vështirë”, tha shefi i agjencisë hapësinore.
Kjo agjenci njoftoi të shtunën se e ka humbur kontaktin me sondën disa minuta para lëshimit të planifikuar në sipërfaqen e Hënës. Objekti fluturues ishte afër polit jugor të Hënës, ku pritej të merrte të dhëna për përbërjen e sipërfaqes dhe shenja të mundshme për praninë e ujit.
Një lëshim i suksesshëm i sondës do ta bënte Indinë vetëm vendin e katërt në botë që arrin ta realizojë një mision të tillë në Hënë dhe vetëm vendin e tretë që do të arrinte ta kontrollonte një robot atje.
Përmes misionit që i ka kushtuar 140 milionë dollarë, India synon t’i studiojë krateret nën hije të përhershme, për të cilat besohet se kanë rezerva të ujit.
Deri tash, vetëm Shtetet e Bashkuara, Kina dhe ish-Bashkimi Sovjetik kanë arritur të dërgojnë sonda në Hënë, shkruan “The Guardian”.
