Teksa testi i djeshëm për Maturën Shtetërore në lëndën e Letërsisë ngjalli debate dhe pakënaqësi të mëdha nga maturantët, vjen një reagim nga zëvendëskryetari i LSI-së Luan Rama. Ky i fundit përmes një postimi në ‘Facebook’ theksoi se testet e provimit të Maturës janë dëshmi e injorancës së ministrisë së Arsimit.
Sipas Luan Ramës, provimet janë kthyer në një makth e për më keq se kaq, testet e përgatitura nga QSHA, institucion në varësi të Ministrisë së Arsimit, në vend që t’iu japin maturantëve mundësinë të shprehin gjithë njohuritë e fituara, i venë ata përballë një labirinthi pyetjesh pa kuptim. Mes të tjerash ai i ka bërë një pyetje publike ministres Besa Shahini që kjo e fundit t’i japë zgjidhje një ushtrimi që ishte në provimin e Gjuhës Angleze.
REAGIMI I LUAN RAMËS
Një shembull dhe një problem:
TESTET E PROVIMIT TË MATURËS,
SI DËSHMI E INJORANCËS SË MINISTRISË SË ARSIMIT
Provimet e maturës kanë qenë e në fakt do të duhet të jenë gjithmonë një moment shumë i rëndësishëm, për maturantët vetë po e po, por edhe për prindërit e tyre, për mësuesit, për shkollën e për gjithë shoqërinë.
Sepse, aq sa janë mbyllja e një periudhe të rëndësishme të sistemit të shkollimit dhe edukimit, janë edhe nisja e një etape të re në jetën e maturantëve, të etapës së përballjes me sfidat e jetës. Mirëpo në fakt, provimet e këtij viti ca më shumë se një vit më parë, janë kthyer në një makth e për më keq se kaq, testet e përgatitura nga QSHA, institucion në varësi të Ministrisë së Arsimit, në vend që t’iu japin maturantëve mundësinë të shprehin gjithë njohuritë e fituara, i venë ata, pra maturantët, përballë një labirinthi pyetjesh pa kuptim, pa përmbajtje e për më tepër, në tërësi i venë përballë pyetjesh që janë dëshmi e injorancës së atyre që i kanë përgatitur.
Pa asnjë tendencë negativiste, më duhet të them se sistemi i maturës shtetërore është një dështim, siç është në fakt dështim e gjithë politika arsimore që po zbatohet pa asnjë vizion e pa asnjë shenjë horizonti se ku duhet të mbërrijë shkolla jonë dhe i gjithë sistemi ynë arsimor.
Për ta bërë më të qartë arsyen se përse matura shtetërore është një dështim dhe po aq, edhe një sistem fyes e tallës për maturantët, po ju sjell një shembull nga testi i gjuhës angleze, të zhvilluar gati dhjetë ditë më parë, e gjithsecili prej jush të verë veten në provë që t’u japë përgjigje pyetjeve të testit të ministrisë së Besës së qeverisë së Edi Ramës.
Ja njëra nga kërkesat e testit:
Në anglisht:
“Jane ëas the 7th out of 8 children.
Ëhat child ëas jane?
A. The first one,
B. The second one,
C. The 5-th one,
D. Or the last one?
(Përkthimi i testit në shqip:
Xhein ishte e shtata nga tetë fëmijë.
Cili fëmijë ishte Xhein?
A. Fëmija i parë,
B. Fëmija i dytë,
C. Fëmija i pestë,
D. Fëmija i fundit?)
Dhe tani, le t’u përgjigjet këtyre pyetjeve të testit, në anglisht apo në shqip, zonja ministre e arsimit apo edhe vetë zotëria kryeministër i saj, e pastaj le të na tregojnë përralla për maturën shtetërore dhe për sistemin e tyre arsimor!
