Kandidatja për deputete e LSI-së në Qarkun e Beratit, Esmeralda Qirko ka zhvilluar një takim me gratë dhe vajzat e rajonit nr.1 e këtij qyteti.
Qirko e cila vjen na bota e biznesit ka bërë të ditur se LSI ka një plan konkret dhe se fokusi i tij do të jetë mbështetja e vajzave dhe grave, duke u mundësuar atyre punë të mirëpaguar.
Sipas saj, “punësimi i grave dhe mbështetja e familjes shqiptare janë prioritetet e mëdha dhe të padiskutueshme të LSI”.
“Sot zhvillova një takim me gra dhe vajza në rajonin nr. 1 të Bashkisë së Beratit. Ishte takim shumë inkurajues dhe me shumë energji pozitive.
Të jesh midis grave dhe vajzave të Beratit kupton se sa e rëndësishme është që ato të kenë punësim të mirëpaguar, arsim cilësor për fëmijët e tyre dhe një perspektivë të qartë zhvillimi për qytetin ku ato jetojnë dhe ku duan të ndërtojnë të ardhmen e tyre.
Për të gjitha këto, LSI ka një plan konkret, i cili do të jetë shtylla e programit të saj qeverisës pas zgjedhjeve të 25 Prillit.
Programi qeverisës i LSI do të ketë në fokus mbështetjen dhe rritjen e rolit të gruas në shoqëri dhe vendimmarrje.
Punësimi i grave dhe mbështetja e familjes shqiptare janë prioritetet e mëdha dhe të padiskutueshme të LSI, e cila në 25 Prill do të arrijë një rezultat spektakolar në Berat dhe në të gjithë Shqipërinë, pikërisht në saj të mbështetjes së madhe të grave dhe vajzave shqiptare”, thekson Qirko.
