Kandidati për deputet për Partinë Demokratike në qarkun e Gjirokastrës, Tritan Shehu mëngjesin e sotëm ka dorëzuar në organin e akuzës kallëzim penal për shtatë kryetarët e bashkive të Qarkut.
Sipas tij këta të fundit kanë shkelur disa herë ligjin kryesisht për mos vendosjen në dispozicion të hapësirave publike subjekteve politike për reklamimin e posterave elektoralë brenda afat që përcakton ligji.
Gjithashtu Shehu ka denoncuar dhe disa drejtues të institucioneve të ndryshme publike të cilët ushtrojnë presion ndaj punonjësve të administratës me qëllim orientimin e votës në favor të partisë në pushtet.
“Pjesëmarrja hapur e këtyre drejtuesve institucionesh në orarin e punës, është një tjetër shkelje që u rëndon atyre dhe për të cilën do të mbajnë përgjegjësi penale.Fakte dhe prova konkrete janë dorëzuar sot duke i kapur në flagrancë në shkelje drejtuesit që akuzohen”- thekson Shehu.
Ai nuk bëri publike emrat e drejtuesve të institucioneve por garantoi se ato do të bëhen publike fill pasi të depozitohen në organin e akuzës.
