Avokat Spartak Ngjela, ka komentuar situatën paszgjedhore duke treguar pse opozitarët po heshtin dhe çfarë kërkon të bëjnë fituesit. Përmes një postimi në Facebook, ai shprehet se një pjesë e atyre që humbën akuzojnë Partinë Socialiste, për vjedhje votash sepse i ka kapluar frika që reforma në drejtësi do ecë përpara. Sipas Ngjelës, është absurde që po hedhin akuza, ata të cilët deri më sot janë përfshirë vetë në skandale për blerje votash.
“Humbësit, të gjithë janë të prerë në fytyrë dhe të shthurur nga sistemi logjik individual, flasin vetëm fjalë që shtyhen të dala nga mllefi i tyre. Por, më keq duken ata që vetëquhen analistë dhe që dallojnë që janë të trembur. Pse vallë? Mendonin, që, meqë kishin të njëjtin hall me Saliun për reformën antikorrupsion, Saliu do ta bllokonte. Jemi në një situatë ku krerët e Partisë Demokratike janë fshehur, kurse një grup i pakuptimtë gazetarësh që duan t’u mbushin mendjen njerëzve se votat janë vjedhur nga fituesi, po i bëjnë shqiptarët të qeshin. Si mund të thuash që më kanë vjedhur, pa paraqitur një provë të vetme?! Më e bukura është refreni: janë blerë votat dhe po ju del që deri tani është kapur humbësi si blerës votash”, shkruan ai.
Sipas Ngjelës, Basha dhe demokratët të tjerë, po rrinë në heshtje sepse thellë e dinë që më keq se mazhoranca, ata kanë bërë afera korruptive të pajustifikueshme për fushatë.
“Por, dallohet edhe diçka: të gjithë këta u dallua se janë të trembur, dhe kjo u kuptua nga ngjyra e fytyrës në daljet e të hënës, të martës, edhe të mërkurës: Pse? Nuk i dihet… autorët politikë të korrupsionit kanë paguar nga të katër anët. Por ka pasur shumë lloj pagesash. Nejse, do t’i dëgjoni. Ndërkohë, kryetari i Partisë Demokratike, Lulzim Basha nuk dihet se ku është, sepse doli vetëm një ditë dhe nuk tha asgjë”, tha ai. Ndërkohë, Ngjela analizon se Rama kërkon të bashkëqeverisë me Bashën sepse ka influencë edhe nga ndërkombëtarët. Prandaj ai po shkon drejt asaj linje për të vendosur rregullin që ata kërkojnë për Shqipërinë.
“Po Rama? Asgjë deri tani, sigurisht që e ndjen qetësinë e fitores, por nuk e di se si do të vijojë kjo histori. Në fakt, po kuptohet se po bën çmos që të mbajë përballë Saliun dhe Lulzimin. Prandaj po fton Lulzimin për bashkëpunim dhe nuk e godet më Saliun. Po ekspertiza ndërkombëtare që monitoron ndërkohë Shqipërinë, nuk do të influencojë në ristrukturimin e të djathtës shqiptare? Ajo do të ndërhyjë, se me këtë fitore nuk dihet se si do të sillet politikisht Edi Rama me Uashingtonin dhe Berlinin. Prisni dhe shikoni”, shkruan ai.
