Ditën e djeshme, gazetarja e njohur Ilva Tare, ka njoftuar se pas 25 vitesh në ekran, do të tërhiqet nga puna në televizion, për t’iu përkushtuar më shumë familjes së saj, bashkëshortit dhe dy fëmijëve. Një “lamtumirë” i ka dhënë edhe ambasadorja e SHBA, Yuri Kim.
Kim me anë të një postimi në Instagram, thotë se intervistën e parë e dha për Ilva Tare në emisionin “Ilva now”, për shkak të reputacionit dhe inteligjencës së gazetares.
Ambasadorja shkruan se do ta marrë malli për emisionin e Ilvës, teksa i uron suksese asaj për jetën dhe zgjedhjet që do të ketë në vijim.
“Unë zgjodha “Ilva now” për intervistën time të parë në Shqipëri për shkak të reputacionit të saj për integritet dhe inteligjencë. E vërtetë ndaj këtij reputacioni, ajo më bëri pyetje të vështira, por të drejta, duke më kërkuar llogari në emër të shikuesve të saj.
Që nga ajo intervistë e parë, unë kam mësuar shumë prej saj për Shqipërinë, sa ka ndryshuar (ose jo) në dekadat që kur Shqipëria u bë demokraci dhe Ilva Tare u bë gazetare, sa më shumë potencial mban ky vend i mrekullueshëm – vendi që ajo e do aq shumë – për të ardhmen. Unë e kam vlerësuar analizën e saj me sy të qartë, humorin, guximin, mirësinë e saj dhe mbi të gjitha ndjenjën e saj të shpresës. Do të më marrë malli për shfaqjen e saj, por e di që do të qëndrojmë miq për një kohë të gjatë. Faleminderit, Ilva, që ishe një gazetare e mirë dhe mike e mirë. Unë e di që do të keni sukses në çdo gjë që vjen më pas, ashtu si keni bërë gjithmonë,” shkruan Kim në postimin e saj.
