“Vendet e Ballkanit Perëndimor nuk kanë treguar efikasitet për të përthithur projekte dhe fondet të mjaftueshme nga Bashkimi Evropian”, është shprehur sekretarja e Përgjithshme e Këshillit të Bashkëpunimit Rajonal, Majlinda Bregu gjatë intervistës.
“Për të patur projekt rajonal, duhen ide rajonale dhe lobime nëpër banka. Ne nuk jemi të suksesshëm për të përthithur projekte rajonale. Flas për të gjithë rajonin, sepse e kuptoj se gjuha vete ku dhemb dhëmbi, por jam e detyruar të flas për rajonin”, – tha Bregu.
Ajo foli për diskutimin në Samitin e Berlinit, ndërsa tha se mesazhi kryesor që u përcoll ishte: që problemet bilaterale midis vendeve të Ballkanit Perëndimor, nuk duhet të bëhen kurrsesi pengesë për agjendën e zhvillimit rajonal.
“Mesazhi i sotëm edhe pse ishte samiti i fundit nën drejtimin e Merkel, ishte vijimi i bashkëpunimit rajonal dhe për të mos lejuar që problemet bilaterale të rëndojnë mbi agjendën rajonale”, – tha ajo.
Përballë moderatores Erla Mëhilli, znj. Bregu tha se rruga europiane e Shqipërisë dhe e vendeve të tjera të Ballkanit Perendimor, po zvarritet për faktin se Bashkimi Europian e ka humbur “magjinë e dikurshme”.
“Prej nëntorit të vitit të kaluar ka një plan, që quhet tregu i përbashkët rajonal të Ballkanit Perëndimor të gjashtë vendeve. Është një projekt, i cili sot nuk e ka atë magjinë që ka pasur dikur. Ne nuk mund të presim edhe 30 vjet të tjera në rajon, që të themi se jemi vend anëtar i BE-së, kur vendet anëtare të BE kanë probleme me njëri-tjetrin dhe me bashjetesën e tyre”, – theksoi znj. Bregu.
