Një ngjarje me pasoja për jetën është parandaluar ditën e sotme nga Policia e Fierit.
Burime për uniformat blu bëjnë me dije se kanë arrestuar shtetasin Fakim(Ilvan) Zyka, 30 vjeç banues në Mbrostar Ura Fier, pasi ka qëlluar në ajër dhe më pas ka kanosur me armë zjarri fqinjin e tij 55-vjeçarin M.K.
Gjithashtu, në pranga ka rënë edhe babai i 30-vjeçarit, 59-vjeçari Petrit Zyka i cili mbante pa leje armë zjarri pistoletë.
Gjatë kontrollit u sekuestruan në cilësinë e provës materiale një armë zjarri automatik, një pistoletë dhe një krehër me 18 fishekë.
Ndërkohë, materialet do i kalojnë Prokurorisë pranë Gjykatës së Shkallës së Parë Fier, për veprat penale “Mbajtja pa leje e armëve dhe municionit luftarak” dhe “Kanosja”.
Njoftimi i Policisë:
Policia parandalon përshkallëzimin e mëtejshëm të një konflikti me pasoja të rënda për jetën.
Reagimi i menjëhershëm dhe profesional i Policisë ka bërë të mundur neutralizimin dhe prangosjen e 30-vjeçarit, i cili gjuajti në ajër dhe kanosi me armë zjarri fqinjin e tij.
Gjatë ndërhyrjes, Policia ka vënë në pranga edhe babain e 30-vjeçarit, pasi edhe ai posedonte një armë zjarri pistoletë.
Sekuestrohet arma e zjarrit automatik me fishekë në fole gati për qitje, arma e zjarrit pistoletë dhe municion luftarak.
Shërbimet e Komisariatit të Policisë Fier, pas një telefonate të ardhur në Sallën Operative të DVP Fier se në fshatin Mbrostar Ura, një shtetas po qëllonte me armë zjarri, menjëherë kanë shkuar në adresën e dhënë, duke parandaluar ngjarjen e mundshme kriminale.
Punonjësit e Policisë kanë bërë të mundur neutralizimin dhe prangosjen e shtetasit F.(I). Z., i cili pas një konflikti për motive të dobëta me fqinjin e tij, shtetasin M. K., 55 vjeç, e ka kanosur atë duke gjuajtur në ajër me armë zjarri automatik, nga oborri i banesës së tij.
Në vijim të veprimeve, nga specialistët për Hetimin e Krimeve në Komisariatin e Policisë Fier u arrestua në flagrancë shtetasi F. (I). Z., 30 vjeç, banues në Mbrostar Ura, Fier, si dhe babai i tij, shtetasit P. Z., 59 vjeç, banues në Mbrostar Ura, Fier, i cili mbante pa leje një armë zjarri pistoletë.
U sekuestruan në cilësinë e provës materiale një armë zjarri automatik, një pistoletë dhe një krehër me 18 fishekë.
Materialet do i kalojnë Prokurorisë pranë Gjykatës së Shkallës së Parë Fier, për veprat penale “Mbajtja pa leje e armëve dhe municionit luftarak” dhe “Kanosja”.
