Kur vjen fjala te ndërtimet, ato dihet që në shumicën e rasteve janë kaotike në Tiranë, me pallate ngjitur mes tyre, e që nuk respektohen as hapësirat e gjelbërta.
Por çudia e radhës që ka vjedhur vëmendjen e rrjeteve sociale gjatë ditës së sotme është ajo që ndodh në zonën e Unazës së Re, ose siç njihet ndryshe zonën e Astirit, ku në sheshin mes 5 pallateve, po ngrihet një tjetër pallat.
Ka qenë aktivisti Endri Tafani ai që ka publikuar i pari fotot e kësaj masakre, teksa thotë se gjithësecili prej nesh të dalë në dritare, dhe të shohë betonizimin që i është bërë çdo zone të kryeqytetit, duke zhdukur çdo gricmë të mbetur të historisë dhe kujtimeve.
Postimi i Tafanit:
E dini çfarë mund të bëhet në 100 m2 shesh në mes të 5 pallateve?
Një pallat tjetër sigurisht. Aq afër ndërtimi i ri, sa praktikisht zëre se u ka vënë tulla dritareve të pallateve ekzistues. Praktikisht i ka burgosur në shtëpitë e tyre.
Dilni në ballkon apo mos dilni fare më mirë, por nga dritarja e vendit ku jeni, hidhni një vështrim jashtë saj. Vetëm beton ngjitur. Beton i shëmtuar ngjyra ngjyra. Aq afër me dritaren sa te merr frymën. Jemi të gjithë të burgosur në Tiranë.
Tirana vdiq si qytet e nuk bëhet kurrë më. E bashkë me të dhe një pjesë e jona, sidomos e atyre që kanë jetuar në Tiranë tjetër.
Por përveç vdekjes është dhe kjo puna e burgut që na mbajnë. Të burgosur përtej vdekjes. Nuk di më keq se kaq.
