Një çarje e madhe ka nisur të marrë formë në PD, që nga momenti kur Lulzim Basha vendosi të përjashtojë Sali Berishën nga grupi parlamentar, duke ndezur gjakrat në selinë blu si kurrë më parë kundër një vendimi që vjen nga zyra e kryetarit.
Si Basha, ashtu dhe Berisha dolën në publik këtë paradite në rrugën drejt parlamentit duke shfaqur forcën. Basha i shoqëruar nga deputetët e sapozgjedhur, i rrethuar me disa nga më besnikët e tij. Rrugës drejt parlamentit, ai doli në oborrin e PD-së nën shoqërinë e Zef Hilës, Orjola Pampurit, Kreshnik Çollakut etj. Në kuvend, u ul mes dy nënkryetareve Grida Dumës dhe Jorida Tabakut, ndërsa në dalje ishte nën shoqërinë e sekretarit të përgjithshëm Gazmend Bardhit dhe deputetit Ervin Salianji.
Basha ka mbështetjen e shumicës së grupit parlamentar, por zërat kundër nuk munguan brenda grupit parlamentar. Edi Paloka dhe Flamur Noka u panë poshtë shtëpisë së Sali Berishës, në momentin që ai nisej drejt parlamentit këtë mëngjes. Dy deputetët shoqëruan Berishën edhe në oborrin e parlamentit, kur iu bashkua edhe Tritan Shehu. Një zë që nuk duhet shpërfillur është ai i militantëve, që u rreshtuan përkrah liderit historik, menjëherë pas vendimit për ta përjashtuar. Disa prej tyre e pritën Lulzim Bashën në oborrin e PD-së, duke e sharë dhe ofenduar sapo ai doli nga zyra.
Fyerjeve të vazhdueshme si “legen”, “injorant” dhe thirrjeve në kor për “turpin” e përjashtimit të Berishës, Lulzim Basha nuk iu përgjigj, por vazhdoi rrugën. Në hyrje të parlamentit, disa dhjetëra militantë të tjerë, pritën Sali Berishën, i cili i ka përshëndetur me dy gishta.
Lideri historik i demokratëve, shpërtheu në akuza ndaj kryetarit aktual Lulzim Basha, duke konfirmuar se ndarja e PD tashmë është pa kthim. Berisha foli për “pazare të fëlliqura” mes Bashës dhe Ramës dhe për një marrëveshje okulte mes të dyve. Ai tha se do të mbetej pjesë e PD-së, ndërsa paralajmëroi një lëvizje statutore brenda partisë për atë që e quajti “rikthim të PD në piedestal“.
Pavarësisht vendimit të fortë që ka marrë, Basha ka preferuar të qëndrojë në heshtje. I vetmi prononcim është dhënë rrugës për në kthim në Partinë
Në sallën e parlamentit, pranë Berishës qëndroi Tritan Shehu, ndërsa një ulëse më tej ishte Monika Kryemadhit. Lulzim Basha ia ka dalë të krijojë profilin e një linje më të moderuar në opozitë. Mbetet për t’u parë se si do të konkretizohet kjo çarje e opozitës në mandate deputetësh, por si rrallëherë, Edi Rama kishte luksin të fliste i qetë me gazetarët që e rrethuan në oborrin e parlamentit. Ai foli për qëllime të larta që duhet të përmbushë në mandatin e tretë qeverisës, për shpresa dhe ëndrrat e qytetarëve, duke iu shmangur një komenti të drejtpërdrejtë mbi tensionet brenda opozitës. Sidoqoftë “dora ime mbetet e shtrirë për Lulzim Bashën” u shpreh Rama, i ndërgjegjshëm se tani është më e lehtë të përmbushet thënia se njëra dorë lan tjetrën e të dyja, lajnë fytyrën.
