Deputeti i Partisë Demokratike, Agron Gjekmarkaj, shprehet se ish-kryeministri Sali Berisha, e ka mbyllur ciklin politik dhe se nuk duhet të rikthehet në krye të PD.
Në emisionin “Opinion”, Gjekmarkaj tha se Berisha nuk mund të relativizojë Lulzim Bashën, që ka marrë 40 mijë vota në garën e Qershorit për drejtimin e partisë.
Sipas deputetit, PD nuk mund të jetë parti fituese me një kryetar të shpallur “non grata” nga SHBA-të.
“Nuk jemi në proces gare. Nuk mund të garojë në Kuvend. Aksionerët e partisë, janë anëtarët e partisë të cilët i kanë dhënë 40 mijë vota Lulzim Bashës. 3 apo 4 mijë veta në Kuvend nuk mund të relativizohen 40 mijë vota që ka marrë Basha në qershor. Bëhet fjalë për një miting, Kuvend që nuk dihet a do jetë legal a nuk do jetë. Në këto 5 apo 6 javë sa herë jam pyetur jam kujdesur të them që Berisha është një personalitet i të djathtës, një njeri me staturë të lartë intelektuale, dhe politike. Nuk jam kujdesur për hipokrizi, apo politikë, por mendoj e ka mbyllur ciklin e tij, me të gjitha sukseset dhe dështimet. Ai e di shumë mirë që kryetari i PD nuk mund të jetë non grata nga SHBA-të. Ai mund të jetë por nuk mund të jetë fituese PD-ja. Është e pamundur të sjellë një gjë të re në PD. Berisha mund të ishte patriarku moral i PD, është ende në kohë për të qenë, por nuk mund të jetë e ardhmja e PD. Mendoj që Berisha e ka mbyllur këtë cikël në 30 vjet, tani edhe mosha e tij nuk e lejon, sepse pas 5 vitesh do jetë 82 vjet. Ne e dimë që SHBA-të janë fuqi madhore e botës. Janë ata stabilizatori. Nuk mund ta trajtojmë si fuqi minore, si shaka. Berisha e di më mirë se kushdo fuqinë e tyre. Do i kishte pasur hije Berishës që ti mallëngjente demokratët duke u mart*irizuar për interesat e kësaj partie, por ai ka zgjedhur debatin. Por debati me SHBA-të e zvogëlon PD-në, mund ta çojë në deriva që ne nuk na i merr mendja, mund ta çojë drejt asgjësimit. Duhet tua themi shqiptarëve këtë. Është e pamundur që një parti politike në Shqipëri të vijë në pushtet, të qeverisë nëse nuk është në sintoni me SHBA-të”, u shpreh Gjekmarkaj.
