Ish-kryeministri Sali Berisha ka mbajtur fjalën e tij te monumenti i Azem Hajdarit në Qytetin Studenti, ku tha se ai ishte një djalë zemërluan që i priu lëvizjes për regjimin komunist. Berisha tha se lëvizja e studentëve i riktheu shqiptarëve lirinë, ndërkohë që nuk la pa akuzuar dhe kryetarin aktual të PD-së Lulzim Basha, të cilin e quajti Lulzim Boshi.
Berisha u shpreh se ‘pengkryetari’ çoi dëm djersën e derdhur nga mijëra demokratë në vitet e vështira në opozitë. Sipas Berishës e vetmja zgjidhje për ta rikthyer PD-në fituese është rithemelimi që do të bëhet në Kuvendin e datës 11 Dhjetor.
FJALA E BERISHËS:
Lëvizja e Dhjetorit që drejtohej nga Azem Hajdari, djali zemërluan, ndau historinë dhe epokat, shkallmoi dyert e mbyllura të lirisë për Shqipërinë dhe shqiptarët. Sot ne mblidhemi, këtu në këtë shesh, ku dhe filloi revolucioni paqësor më i madh, në historinë e kombit shqiptar, revolucion paqësor që do të sillte vendosjen e pluralizmit politik në Shqipëri, dhe përmbysjen e diktaturës më moniste të Europës.
Në këtë kontekst, ata që nisën këtë revolucion, Azem Hajdari që i priu atij, firmosën në historinë e kombit, një prej faqeve më të ndritura. Studentët, të cilët iu prinë shqiptarëve, u quajtën ëngjëjt e demokracisë. Ato u përballën ato ditë me një betejë që ngjason me atë të Davidit dhe Golias, me vendosmërinë e tyre të hekurt, guximin e tyre të jashtëzakonshëm, studentët të mbështetur nga pedagogët dhe qytetarët e Tiranës, ia dolën të rrëzonin diktaturën komuniste.
PD dorëzoi pushtetin me zgjedhje në vitin 2013, në pushtet erdhën bijtë e atyre që u përmbysën me votë në 22 Mars të vitit 1992, erdhi Edi Rama, i cili në dhjetor të ’90 sapo filloi lëvizja studentore ia mbathi në Korfuz, dhe u kthye pasi përfundoi çdo gjë.
Në këto 8 vite, ai me lidhjet e tmerrshme me krimin, çbëri në mënyrë kriminale arritjet e njëpasnjëshme të shqiptarëve. Në këto 8 vite PD, demokratët, derdhën lumenj djerse, sakrificash të jashtëzakonshme, por mjerisht kaluan nga një humbje në një humbje tjetër, për shkak të njeriut i cili pas 8 vitesh as më pak dhe as më shumë se peng kryetari, ose Lulzim Boshi.
Sot vimë në një dhjetor të ri, të idealeve të larta, të rithemelojmë partinë e vitit ’90, të botës së lirë. Vimë më të vendosur se kurrë se ashtu siç përmbysëm diktaturën hoxhiste, të çmontojmë narkoshtetin e Kristaq Ramës dhe pengun e tij Basha. Të rikthejmë vlerat konservatore dhe dinjitetin njerëzor. Bashkëpunimi dinjitoz me vendet e mëdha, SHBA E BE . 11 dhjetori është ditë e madhe e atyre që themeluan PD-në, e atyre që bënë pluralizmin,u ngritën si feniksi për demokracinë.
