Deputeti demokrat Belind Këlliçi i ka bërë thirrje kryedemokratit Lulzim Basha që të mos vazhdojë më duke thënë gënjeshtra se Grupi Parlamentar i PD-së ka rënë dakord që Berisha të largohet nga partia.
Sipas Këlliçit, i vetmi moment kur Basha bashkoi demokratët ishte për dorëheqjen e tij, teksa thotë se kryedemokrati sot nuk është aspak pjesë e zgjidhjes.
Postimi i plotë:
Kolegu ynë Lulzim!
Ke dy ditë që dredhon live para kamerave. Selia e PD ndodhet në qendër të Tiranës, prandaj mos i bjer nga Kina!
I vetmi moment që bashkove demokratët ishte për dorëheqjen tënde, e cila është fakt i kryer pasi Kuvendi Kombëtar të ka shkarkuar nga funksioni më 11 dhjetor. Nuk priti humbjen e gjashtë.
Ti sot nuk je aspak pjesë e zgjidhjes.
Ke mbushur dynjanë sikur grupi ynë parlamentar është dakordësuar që Berisha të largohet. Sikur zëdhënës i grupit të ishe, me këtë gënjeshtër që ke thënë, do ishe shkarkuar njëzëri.
Mjaft me këto lojëra e marifete! Ka një kohë maturimi për të gjitha. Edhe për burrninë.
