Këshilli i Ministrave ka miratuar në mbledhjen e sotme, 18 mars, një vendim që i hap rrugë qëndrimit të gjithë shtetasve të Ukrainës që ikin nga lufta, të qëndrojnë në Shqipëri deri në 1 vit pa pasur nevojën e një leje qëndrimi.
Ukrainasit janë të dytët që përfitojnë nga vendimi i Qeverisë Shqiptare, pasi në vendin tonë edhe shtetasit amerikanë kanë të drejtën të qëndrojnë një vit pa nevojën e një leje të aprovuar nga autoritetet përkatëse. Pra, tashmë ukrainasit dhe amerikanët, bëhen dy kombësitë që mund të qëndrojnë në Shqipëri deri në 1 vit, pa leje qëndrimi.
VENDIM PËR PËRCAKTIMIN E AFATIT TË HYRJES DHE QËNDRIMIT TË SHTETASVE TË UKRAINËS NË REPUBLIKËN E SHQIPËRISË
Në mbështetje të nenit 100 të Kushtetutës dhe të pikës 2, të nenit 29, të ligjit nr.79/2021, “Për të huajt”, me propozimin e ministrit të Brendshëm dhe të ministrit për Evropën dhe Punët e Jashtme, Këshilli i Ministrave
VENDOSI:
- Shtetasit e Ukrainës kanë të drejtë të hyjnë dhe të qëndrojnë pa leje qëndrimi në Republikën e Shqipërisë për një afat deri në 1 (një) vit.
- Ngarkohen Ministria e Brendshme dhe Ministria për Evropën dhe Punët e Jashtme për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
