U nënshkrua sot marrëveshja e bashkëpunimit Agjencisë Telegrafike Shqiptare dhe Institutit të Historisë për shkëmbimin dokumentar në funksion të kërkimit shkencor, në fushën e studimeve albanologjike, të cilat kanë në fokus studimet historike të Shqipërisë dhe të hapësirës shqiptare.
E pranishme në nënëshkrimin e marrëveshjes ishte drejtoresha e përgjithshme e ATSH-së, Valbona Zhupa dhe drejtori i Institutit të Historisë, prof. dr. Afrim Krasniqi.
Zhupa u shpreh se marrëveshja mundëson promovimin e ATSH-së dhe bashkëpunimin në aktivitete e botime dokumentare, si dhe në rritjen e aksesit të dokumenteve arkivore në studime monografike.
“Kjo marrëveshje ka si objekt bashkëpunimin midis dy institucioneve në fushën e shkëmbimeve të informacionit dhe të dokumentacionit, si dhe të aktiviteteve të përbashkëta në vijim të botimeve që burojnë nga këto dokumente”, u shpreh Zhupa.
Ndërsa drejtori i Institutit të Historisë, prof. dr. Afrim Krasniqi, u shpreh se “kjo marrëveshje krijon bashkëpunim në nivele institucionale dhe të kërkimit, lehtëson aksesin në dokumentacionin dhe në aktivitete të përbashkëta, në rastin e organizimeve studimore apo botimeve dokumentare që lidhen me dokumentacionin historik të shtetit shqiptar”.
“Për Institutin e Historisë, marrëveshja mundëson akses të gjerë kërkimor në dokumentacionin arkivor të ATSH, për trajtim profesional dhe shkencor të zhvillimeve historike dhe albanologjike, si një interes institucional dhe kombëtar”, tha Krasniqi.
