Ish-kryeministri Sali Berisha ka përmendur heroin kombëtar Skënderbeun, si shembull për bashkimin e demokratëve dhe gjithë shqiptarëve, gjatë një takimi me militantët e PD-së në Shkodër.
Berisha nuk la pa thumbuar as ambasadoren amerikane Yuri Kim, e cila shpesh i referohet Skënderbeut si një hero i jashtëzakonshëm dhe frymëzues për shqiptarët. Ish kryeministri tha se çdo dashuri tjetër ndaj Skënderbeut është e rreme, duke iu referuar deklaratave të Kim sot
“Skënderbeu ishte Davidi ynë, ishte Davidi që me një guxim të jashtëzakonshëm me një kurajo mbinjerëzore u përball me Goliathin më të rrezikshëm të kohërave. Dhe qëndroi në kushtet më të pabarabarta, qëndroi dhe shkroi ato faqe të historisë që janë dhe do mbeten frymëzuese për çdo shqiptar.
Skënderbeu është frymëzues për secilin prej nesh, çdo dashuri tjetër për Skënderbeun, jashtë mesazheve të tij është “fake” e rreme, e pavlerë. Ndërsa ne do qëndrojmë për frymëzimin që i jep ai. Sot mund të jemi një pakicë, por ju garantoj së shpejti do jemi shumicë”, deklaroi Berisha.
