Kryeministri Edi Rama është shprehur se samiti i BE-së, i cili do të mbahet javën e ardhshme, nuk pret që t’i hapë rrugën Shqipërisë për të filluar bisedimet e anëtarësimit në Bashkimin Evropian dhe kjo për fajin e Bullgarisë.
Në një intervistë për POLITICO, Rama e bëri të qartë se ishte pesimist sa i përket kësaj çështje.
“Nuk kam asnjë pritshmëri. Unë mendoj se asgjë nuk do të ndodhë. Shqipëria dhe Maqedonia e Veriut nuk do të hapin zyrtarisht bisedimet për të pasur anëtarësim”, tha ai.
I pyetur nëse ndonjë lider i BE-së kishte sinjalizuar se bisedimet mund të fillojnë së shpejti, Rama u përgjigj: “Çfarë sinjalesh mund të japin? Nuk bëhet fjalë për ta. Përsëri, bëhet fjalë për Bullgarinë. Të gjithë janë dakord, të gjithë mbështesin, të gjithë mendojnë se kjo duhet të ndodhë, dhe kjo duhet të kishte ndodhur tashmë. Por kufiri i tyre i manovrimit është i kufizuar nga Bullgaria.
Kryeministri më tej tha se nuk e pret që udhëheqësit bullgarë të ndryshonin pozicionin tyre, pasi ata e kanë bërë mosmarrëveshjen e tyre në një çështje aq të madhe sa është shumë e vështirë që të tërhiqen.
“Është një spirale. Ata kanë hyrë në një spirale. Dhe nga kjo spirale, është shumë, shumë e vështirë të dalësh”, deklaroi Rama.
Rama konfirmoi se nëse nuk ka përparim këtë muaj, ai do të kërkojë që oferta e Shqipërisë për anëtarësim të trajtohet veçmas nga ajo e Maqedonisë së Veriut, një hap që BE deri tani ka hezituar ta ndërmarrë, me zyrtarët që argumentojnë se do të ishte më mirë për stabilitetin rajonal nëse dy fqinjët mund të përparonin së bashku.
“Nëse asgjë nuk ndodh në qershor, ne do të kërkojmë të ndahemi. Kam besim se kjo është ajo që duhet të bëjmë, atëherë nëse udhëheqësit e BE-së do të bien dakord apo jo, do të shohim.”, tha kryeministri.
Të gjitha qeveritë e BE-së ranë dakord që në mars 2020 t’i japin Shqipërisë dhe Maqedonisë së Veriut dritën jeshile për fillimin e bisedimeve të anëtarësimit. Por, negociatat nuk kanë nisur ende pasi Bullgaria këmbënguli se donte lëshime nga Maqedonia e Veriut në mosmarrëveshjet dypalëshe që prekin gjuhën, historinë dhe identitetin.
Megjithëse bllokada e Sofjes vlen vetëm për Maqedoninë e Veriut, BE-ja ka favorizuar trajtimin e ofertave të anëtarësimit të Shqipërisë dhe Maqedonisë së Veriut së bashku, kështu edhe vendi ynë është i bllokuar.
BE-ja ia dha statusin e vendit kandidat Maqedonisë së Veriut në 2005 dhe Shqipërisë në 2014 , megjithatë nuk ka arritur as të fillojë bisedimet me asnjërin vend.
Javën e kaluar kancelari gjerman Olaf Scholz vizitoi Bullgarinë në mënyrë për të kapërcyer bllokadën e Sofjes përpara samitit të ardhshëm në Bruksel, i cili do të zhvillohet të enjten dhe të premten e javës së ardhshme.
