Stuhitë e fuqishme kanë goditur zona të Evropës qendrore dhe jugore, duke vrarë të paktën 12 persona, përfshirë tre fëmijë.
Vdekjet, shumica nga rënia e pemëve, u raportuan në Itali dhe Austri dhe në ishullin francez të Korsikës.
Shiu i dendur dhe erërat shkatërruan kampingjet në ishull, ndërsa probleme pati edhe në Venecia të Italisë.
Stuhitë e ditëve të fundit pasohen nga javët e të nxehtit dhe thatësirës në pjesën më të madhe të kontinentit.
Në Korsikë, erërat që frynë deri në 224 km/h shkulën pemët dhe dëmtuan shtëpitë e lëvizshme.
Autoritetet atje thanë se një vajzë 13-vjeçare u vra nga një pemë që u rrëzua në një kamping.
Ndërkohë një burrë vdiq në një incident të ngjashëm dhe një grua 72-vjeçare u vra kur makina e saj u përplas nga çatia e shkëputur e një kasolleje në plazh.
Po ashtu dy persona të tjerë humbën jetën në det.
Ministri i Brendshëm Gerald Darmanin, i cili mbërriti në Korsikë të enjten, tha se 20 persona ishin plagosur – katër prej tyre në gjendje të rëndë. Ndërsa paralajmëroi se mund të shpallet gjendja e fatkeqësisë natyrore.
Stuhitë ekstreme janë bërë më të shpeshta kohët e fundit për shkak të ndryshimeve klimatike.
