Nga Mero Baze
U bën gati dy javë që barrikadat mbajnë të bllokuar Veriun e Kosovës dhe akoma më keq mbajnë gjallë tensionin mes serbëve dhe shqiptarëve, në kulmin e interesimit ndërkombëtar për të shkuar drejt bisedimeve përfundimtare Kosovë Serbi.
Eshtë koha të përkujtojmë se barrikadat pasuan daljen nga institucionet e serbëve të Veriut të Kosovës, dorëzimin e mandateve të deputetëve, dorëheqjen e gjykatave dhe prokurorëve si dhe forcave të policisë. Praktikisht rënien e Republikës në veri të Kosovës
Arsyetimi I largimit ishte këmbëngulja e qeverisë së Kosovës për të zbatuar vendimin për targat e vjetra të veturave në Veri të Kosovës që nuk janë legjitime.
Tensionet u ri ndezën më pas me përpjekjet e qeverisë së Kosovës për të zhvilluar zgjedhje pas braktisjes së Kuvendit nga deputetet e listës serbe.
Si përfundim zgjedhjet u shtynë, vendosja e targave u shty, dhe të vetmet që kanë mbetur janë barrikadat.
Por a mund të hiqen ato me forcë?
Natyrisht që nuk është çështja tek pamundësia për një plan ushtarak për ti hequr, por tek padobia e një lufte të re, e cila nuk është prioritet I Kosovës.
Paralajmërimet e Kurtit se nëse KFOR nuk I heq do ti heq qeveria e tij janë dhe më banale. KFOR nuk e ka problem të hapi rrugën dhe të heq barrikadat. KFOR nuk heq dot arsyet përse janë vendosur barrikadat dhe ato arsye duhet ti heq politika, dhe jo ushtria. Kështu sic logjikon qeveria e Kosovës, I bie që ajo ka detyre të krijoj tension në veri dhe të vendosen barrikada kurse KFOR ka detyrë të heq barrikadat që ata ti rivendosin përsëri.
Tensioni në veri dhe barrikadat në rrugë janë bilanci më I keq politik I qeverisë Kurti. Ato janë plotësisht të dirigjuara nga Beogradi, duke gjetur arsyetim në vendime kryekëput adoleshentësh, që shikojnë veten në pasqyrë dhe trimërohen, por kur dalin në rrugë kërkojnë ndihmë.
Dalja e serbëve nga institucionet, dhe barrikadat në rrugë janë praktikisht kryengritje e serbëve në veri të Kosovës. Janë kryengritje kundër rendit kushtetues në Kosovë, dhe refuzim I thellë politik I Republikës së Kosovës. Kjo nuk është një çështje që zgjidhet me autoblinda. Askush në botë, nuk I ka zgjidhur dot kështu. As Miloshevici nuk e zgjidhi dot me tanke çështjen e Kosovës. Me tanke e humbi.
Ndaj është papërgjegjësi e madhe që ta shikosh situatën në veri si prishje rendi që mund të ndreqet me ndërhyrjet e policisë apo ushtrisë. Në veri të Kosovës është prishur rendi kushtetues I Kosovës I cili bazohet tek harmonia dhe integrimi I pakicës serbe në Republikën e Kosovës.
Nuk ka asnjë dyshim për vullnetin e Beogradit që ta pengoj këtë integrim. Por Beogradi do ta kishte të vështirë ta krijonte këtë gjendje, qeveritaret shqiptar të Kosovës, që injoruan këshillat e SHBA dhe BE që të shtyhej për një vit çështjet e dorës së dytë si targat dhe të harxhoheshin energji tek Marrëveshja kryesore e propozuar nga Franca dhe Gjermania. Tani edhe çështjet I shtyn zvarrë dhe bisedimet kanë ngelur, dhe veriu po kthehet në një gangrenë që do të përdoret si presion gjatë gjithë bisedimeve. E vetmja gjë krenare ka mbetur që 24 orë nuk pyetën, as për SHBA, as për BE dhe siç duket as për Kosovën.
