Kandidati për deputet i PD-së në Qarkun e korçës, Kristiano Koçibelli, me anë të një statusi në rrjetet sociale ka falënderuar votuesit për besimin e dhënë.
Por në këtë status Koçibelli shpreh dhe disa pakënaqësi nga kolegët e tij brenda PD-së, teksa shkruan se “ajo e listës së mbyllur çirrej në fushatë jo për Partinë, por për listën e hapur”.
Referuar listës së mbyllur të Partisë Demokratike për Qarkun e Korçës, “ajo e listës së mbyllur” rezulton të jetë Ledina Alolli, pasi është e vetmja femër në listën e mbyllur, e përbërë nga Ivi Kaso, Ledina Alolli dhe e pasuar nga Bledion Nallbati.
Kristiano Koçibelli, i cili ka dhe një lidhje familjare me kandidaten e listës së mbyllur, tashmë të zgjedhur deputete, Ledina Alolli, i ka drejtuar asaj gishtin për një fushatë të pabarabartë.
Siç shkruan dhe vetë, Koçibelli thotë se bëri një fushatë dinjitoze për të siguruar sa më shumë mandate për PD, kurse ajo çirrej për listën e hapur.
Kristiano Koçibelli është një emër që në fakt garoi me dinjitet në Korçë, siguroi vota edhe më shumë se dhe deputetë që kanë prej vitesh apo kandidatë që kanë pasur pretendime të larta.
Në Qarkun e Korçës në fakt gara ishte e pabarabartë, me individë që bllokuan zonat e tyre dhe nuk lejonin kandidat tjetër të mblidhte vota, me përplasje brenda llojit, pazare me kundërshtarët.
Në rastin e Kristiano Koçibellit kemi të bëjmë me një kandidat i cili jo vetëm zhvilloi një fushatë dinjitoze, por dhe çdo ditë të punës së tij e përktheu në votë.
“Përshëndetje miq,
Pas përfundimit të procesit të numurimit të votave edhe për kandidat, rezulton se unë kam marrë 5206 vota, kandidati i dytë më i votuar në qarkun e Korçes nga Partia Demokratike. Faleminderit nga zemra për çdo votë, për mbështetjen ndaj emrit tim, për besimin, për bisedat që kemi zhvilluar së bashku, për takimet me orë të gjata.
Dua ti kërkoj ndjesë familjes sime të cilës i kam munguar për gati 40 ditë, prindërve të mi të cilët mërziten dhe emocionohen nga garat që ne zhvillojmë.
Nga kjo fushatë mësova shumë, pashë një realitet tjetër që nuk e kisha menduar ndonjëherë, njoha njerëz të rinj dhe mbi të gjitha njoha më mirë ata që kam pas njohur me vite.
Gjatë gjithë fushatës u përpoqa të isha vetvetja, një njeri që bën garën me dinjitet, i rrethuar me njerëz me reputacion dhe të respektuar për komunitetin, fushatë pa fyerje dhe ofendime, fushatë ku synimi kryesor ishte të prodhonim sa më shumë mandate për Partinë Demokratike. Por jo të gjithë e bënë këtë si unë, ajo e listës së mbyllur çireshe në fushatë jo për Partinë, por për listën e hapur.
Miq, unë do vazhdoj të jem përsëri i njëjti, i dashur me komunitetim, i përkushtuar për Korcën dhe Shqipërinë.
5200 falenderime për secilin prej jush, jam mirënjohës në pafundësi për besimin e dhënë”, shkruan Koçibelli./cna
