Armë dhe drogë në makinë, katër persona në pranga

0
43
Zjarr Televizion Ad This is a sample article. ...

Katër persona kanë rënë në prangat e Policisë së Shtetit në orët e fundit për armëmbajtje pa leje, posedim lëndësh narkotike dhe aktivitetin e paligjshëm të lojërave të Fatit. Siç bën me dije vetë policia, përveç të arrestuarve të paktën 4 të tjerë janë proceduar penalisht, ndërsa një pjesë e madhe e denoncimeve janë  bërë nga vetë qytetarët. Në mesin e të arrestuarve është edhe një 22 vjeçar nga Puka, i cili lëvizte në makinën e tij me armë zjarri kallshnikov.

Në Librazhd policia ka arrestuar një 49 vjeçar, të cilit i janë sekuestruar edhe 14 fishekë si dhe 7 kg lëndë narkotike të llojit kanabis. Në qytetin e Vlorës mësohet të jetë arrestuar edhe 36-vjeçari me iniciale S.D, të cilit i është sekuestruar edhe lëndë e dyshuar kanabis.  Në qytetin e Lezhës policia ka arritur të arrestojë 50 vjeçarin me iniciale R.G, të cilit i janë gjendur në banesë 1.5 kg lëndë narkotike.

Njoftimi i Policisë së Shtetit

Gjatë 12 orëve të fundit, 7 denoncime nga qytetarët për paligjshmëri në fushën e armëmbajtjes pa leje, lëndëve narkotike dhe lojërave të fatit.

Në pranga 4 persona, si dhe 4 të tjerë u proceduan penalisht.

Sekuestrohen lëndë narkotike, armë zjarri, municion luftarak, tavolina pokeri, aparate celular e laptop.

Në Shkodër, nga strukturat e Komisariatit të Policisë Vau i Dejës, është kapur dhe arrestuar në flagrancë shtetasi D.S., 22 vjeç, banues në qytetin Pukë, me një armë zjarri kallshnikovë, e cila iu gjet gjatë kontrollit të ushtruar në mjetin e tij.

Në Librazhd, shërbimet e Policisë, pas telefonatës nga qytetarët kanë finalizuar operacionin e koduar “Qafë Driza”, ku gjatë kontrollit të ushtruar në mjet, shtetasit L.M 49 vjeç i kanë gjetur 14 copë fishekë, si dhe rreth 7 kg lëndë narkotike e llojit kanabis, të cilat u sekuestruan në cilësinë e provës materiale, ndërsa shtetasi L.M., u arrestua në flagrancë.

Në Lezhë, Specialistët për Narkotikët kanë vënë në pranga shtetasin R.G., 50 vjeç, pasi pas informacionit të marrë dhe kontrollit të ushtruar në banesën dhe territorin përreth banesës së shtetasit R.G., Policia gjeti dhe sekuestroi në cilësinë e provës materiale 1.5 kilogramë lëndë narkotike kanabis.

Ndërsa në Vlorë, Specialistët e Seksionit për Hetimin e Narkotikëve dhe Trafiqeve kanë bërë kapjen dhe arrestimin në flagrancë të 36-vjeçarit S.D., pasi nga kontrolli fizik, Policia i gjeti 30 doza lënde narkotike të dyshuar kanabis.

Ndërkohë po falë denoncimeve të qytetarëve dhe reagimit të menjëhershëm të Policisë janë evidentuar dhe goditur tre raste të ushtrimit të aktivitetit të kundraligjshëm të lojërave të fatit.

Në Tiranë, shërbimet e Policisë të Komisariatit Nr.3, kanë proceduar penalisht shtetasin F. Sh., 27 vjeç, banues në Tiranë, për veprën penale “Vënia në dispozicion e lokaleve për lojëra të palejuara”, pasi në rrugën “Myslym Shyri” gjatë kontrollit të ushtruar në lokalin e këtij shtetasi u gjet një tavolinë pokeri e cila u sekuestrua në cilësinë e provës materiale.

Në Berat, Specialistët e Seksionit për Krimet proceduan penalisht shtetasin A.Z., 47 vjeç, banues në Poliçan, pasi në subjektin “Bar-Kafe” ushtronte aktivitet pa kasë fiskale dhe lojëra fati (lloto sporti). Në cilësinë e provës materiale u sekuestrua një laptop.

Në Elbasan, Policia procedoi penalisht pronarët e një subjekti shtetasit I.Ç., 38 vjeç dhe G.Ç., 22 vjeç, banues në fshatin Vidhas, Elbasan, për veprat penale “Fshehja e të ardhurave”, “Organizimi i lotarive të palejuara”, dhe “Vënia në dispozicion e lokaleve për lojëra të palejuara”, pasi në ambientet e lokalit në pronësi të tyre ushtronin aktivitet të kundërligjshëm të lojërave të fatit.

Policia e Shtetit falënderon qytetarët për besimin dhe fton këdo të denoncojë falas në numrin 112, në aplikacionin “Komisariati Dixhital”, ose përmes rrjeteve sociale në adresat zyrtare të Policisë së Shtetit, çdo rast të paligjshmërisë.

Zjarr Tv Ad