Armando Sulejmani, personi i cili mbeti i plagosur në atentatin e kësaj të diele në Vlorë, është arrestuar.
Masa e arrestit i është komunikuar në spital 42-vjeçarit, ku dhe ndodhet nën kujdesin e mjekëve i plagosur.
Mësohet se arrestimi i tij është bërë për armëmbajtje pa leje, për shkak se i është gjetur një pistoletë.
Suejmani i njohur ndryshe si “Çipuri” është person me precedentë penalë, i cili dyshohet si i përfshirë në një sërë ngjarjesh kriminale në Vlorë.
Sakaq Policia e Vlorës ka shoqëruar rreth 15 persona, të cilët mund të kenë dijeni mbi atentatin e mesditës së të dielës, ku u ekzekutuan me armë zjarri dy persona dhe u plagos një tjetër.
Bëhet fjalë për një atentat të menduar, për shkak se krimi ndodhi në një zonë ku mjediset përreth nuk kishin kamera sigurie, çka vështirëson identifikimin e autorëve.
Dyshohet se shënjestra e atentatit të ndodhur në zonën e “Ujit të Ftohtë”, ishte Armando Sulejmani 42 vjeç, i cili njihej edhe si “Çipuri” dhe rezultonte person me precedentë penalë, si dhe i dënuar më parë për vrasje.
Ai rezulton të ketë qenë edhe anëtar i bandës famëkeqe të Gaxhait, teksa i ka shpëtuar edhe një tjetër atentati në vitin 2016.
Sulejmani ishte duke udhëtuar me makinë bashkë me kunatin e tij, Arjan Hasani 45 vjeç dhe me shokun Orest Rexho 37 vjeç.
Si pasojë e të shtënave humbën jetën Hasani dhe Rexho, ndërkohë që “Çipuri” mbeti i plagosur.
Dy viktimat ndodheshin në vendet e para të makinës, ndërsa Sulejmani ishte pasagjer në sediljet e pasme, në momentin kur u qëlluan me breshëri kallashnikovi.
Pak pas ngjarjes në fshatin Sherisht, policia gjeti duke u djegur një makinë, e cila mendohet se iu përket atentatorëve si dhe tre automatikë brenda.
