Përplasja mes demokratëve, është zhvendosur edhe në studiot e emisioneve televizive. Këtë mbrëmje, i përjashtuari më i fundit nga një post që mbante në PD, Flamur Noka ka debatuar me deputetin durrsak Ferdinand Xhaferri. Noka e ka akuzuar Xhaferrin se ka tentuar të bllokojë Sali Berishën nga mbledhja e firmave në Durrës, por Xhaferri ka mbrojtur vendimin e Bashës për të shkarkuar Berishën, duke thënë se e ka bërë për të mirën e anëtarëve të PD-së.
Xhaferri tha se vendimi i Bashës, ka dhënë rezultate pozitive duke bërë që ndërkombëtarët të “rivendosin” kontaktet me PD-në, e përmes mbështetjes së ndërkombëtarëve, ai tha se PD do të arrijë të vijë në pushtet.
Pjesë nga debati:
Noka: Ke bërë telefonata për të bllokuar mbledhjen e firmave të Berishës në Durrës. Por Durrësi 51% i ka mbledhur. Pra Durrësi është edhe kundër teje.
Xhaferri: Unë jam shumë i qetë, ky vendim i Lulzim Bashës që u mor në limitet kohore, tregon që ai e ka marrë këtë vendim vetëm nga shqetësimi për të ardhmen e Partisë Demokratike dhe anëtarëve të saj.
Noka: Nuk pushkatohet partia nga shqetësimi. Jo. Më the shumë mirë që paska filluar Basha të ketë mbështetjen e ndërkombëtarëve. Basha s’ka mbështetjen e shqiptarëve.
Xhaferri: Ke marrë rolin e barometrit për të matur mbështetjen.
Noka: Ndërkombëtarët, a thua se ndonjëri prej nesh ka qenë kundër ndërkombëtarëve? Marrëdhëniet më të mira i ka patur Sali Berisha me ndërkombëtarët. Jam dakord t’i respektosh marrëdhëniet me ndërkombëtarët, por më parë me shqiptarët.
Xhaferri: Dy arritjet më të mëdha që ka ky komb, kanë ardhur me mbështetjen e SHBA. Partitë bëjnë llogari, dhe zgjedhjet mund të fitohen vetëm në aleancë me ta. Zgjedhjet nuk i fituam se kishim ndërkombëtarët kundra.
Noka: Mos gënje se të kam koleg. Nuk ke pas asnjë ndërkombëtar kundër. Nuk kanë besuar shqiptarët Lul Bashën ose Lul Basha s’ka dashur të fitojë.
Xhaferri: Ti mendon se PS në Durrës ka fituar me zgjedhje të ndershme?
