Kryetari i Partisë Demokratike, Lulzim Basha në një udhëzim drejtuar strukturave të PD-së për situatën e krijuar nga tërmeti thekson që duhet të shkojnë në terren për të evidentuar çdo dëm të shkaktuar nga tërmeti, pa dallim partiak.
Basha në udhëzim shkruan që të gjithë strukturat të takojnë banorët dhe të jenë pranë banorëve të prekur nga tërmeti, për të evidentuar çdo nevojë që banorët kanë.
Në udhëzim thuhet që grupet duhet të mbledhin problematikat që raportojnë qytetarët dhe interesohen nëse u është ofruar ndihmë, si dhe të evidentohen paraprakisht zonat, banesat dhe qytetarët që kanë patur probleme dhe t’u merret kontakti.
“Jini sa më pranë banorëve të prekur nga tërmeti dhe familjarëve të viktimave. Të shtojmë praninë në terren, të takojmë qytetarët e prekur nga tërmeti, të evidentojmë çfarë nevojash kanë. Të evidentojmë dëmet e shkaktuara në banesa, t’i vijmë në ndihmë qytetarëve të prekur me çfarë të mundemi. Grupet mbledhin problematikat që raportojnë qytetarët dhe interesohen nëse u është ofruar ndihmë. Të evidentohen paraprakisht zonat, banesat dhe qytetarët që kanë patur probleme dhe t’u merret kontakti. Evidentimi bëhet pa asnjë dallim partiak. Takohet kushdo dhe interesohemi për nevojat”, thuhet ndër të tjera në udhëzimin e Bashës.
