Kryetari i Bashkisë së Kukësit, Safet Gjici i ka dorëzuar sot titullin ‘Mirënjohje Qyteti’, gjeneralit Major të Emirateve të Bashkuara Arabe, Obaid Al Ketbi.
Ja çfarë shkruan Safet Gjici:
Shumë i Lumtur, që Bashkia Kukës, i ka dorëzuar sot titullin ‘Mirënjohje Qyteti’, gjeneralit Major Obaid Al Ketbi me motivacionin: ‘Për mbështetjen e jashtëzakonshme dhe të pakursyer për motrat dhe vëllezërit tanë të Kosovës duke ofruar një strehë të ngrohtë dhe mikpritje në Kampin e Emirateve,pas luftës shkatërruese me Serbinë në 1999, e cila shkaktoi një shpërngulje masive të qindra mijëra refugjatëve të Kosovës në territorin shqiptar.’
Gjenerali ishte një nga iniciatorët kryesorë, negociues dhe lobues i aftë me përfaqësuesit e Qeverisë së Emirateve të Bashkuara për ndërtimin e Aeroportit të Kukësit.
Gjithashtu, si negociator i shkëlqyer, Gjenerali bëri të mundur implementimin e projektit për furnizimin me ujë të qytetit dhe ndërtimin e ujësjellësit të Lojmeve, shtrimin dhe asfaltimin e rrugëve të qytetit, rrugëve të reja lidhëse me fshatrat Nangë-Gostil, ndërtimin e rrugës Eksod ’99.
Janë këto arsye, që në cilësinë e kryetarit të bashkisë Kukës, kam mirëpritur kërkesën e Grupit të menaxhimit të Krizës kosovare të periudhës 1999, për t’i dhënë titullin ‘Mirënjohje Qyteti’, shkëlqesisë së tij gjeneral major, Obaid Al Ketbi, Ish- Komandant i Misionit Paqeruajtës të Emirateve të Bashkuara Arabe në Kosovë 1999.
