Ish-kryeministri Sali Berisha pati një takim me kryetarin e pranisë së OSBE në Tiranë, Bernard Borchardt dhe ambasadorin e Shteteve të Bashkuara të Amerikës, Donald Lu. Berisha tha se u dorëzoi atyre një ‘dosje’ të emrave të pushtetarëve që janë lidhur me trafikantë droge.
Në takim me diplomatet, Berisha deklaroi para ambasadorëve se vendi ka ardhur në një moment të një rëndësie kritike; zgjedhjet e qershorit. Deputeti i PD shtoi me keqardhje se nuk njeh asnjë shqiptar që të besojë se do ketë zgjedhje të lira në Shqipëri. Ai u shpreh se në vlerësimin e tij shkaku më themelor i kësaj qëndron në shndërrimin e qeverisë shqiptare në një organizatë të vërtetë kriminale.
Sipas tij, sot Edi Rama me lidhjet e tij me krimin, faktikisht drejton këtë organizatë. Ish-lideri i demokratëve u shpreh se janë të panumërta faktet që i faktojnë këto lidhje. Ai tha se vëllai i kryeministrit Rama, Olsi Rama, është faktuar sipas tij me dokumenta i lidhur me Gentian Gjonaj, kreu i trafikut të kokainës në Shqipëri, i cili ka përdorur në mënyrë përsëritur pikërisht makinën e përshtatur nga banda për trafik kokaine, për të dalë jashtë shteti.
Ai shtoi të gjitha të dhënat për këtë ekzistojnë në sistemin TIMS. Nga ana tjetër, Berisha u shpreh se Rama është i regjistruar tek kërkon miliona ryshfete dhe komunikuar me trafikantët dhe kriminelët më të rrezikshëm duke u përpjekur t’i mbrojë ata. Berisha pohoi se Rama po bën gjithçka, me presion të jashtëzakonshëm mbi gjykatësit për të liruar bandat, ku pas lirimit të Lulzim Berishës, ka kthyer mbrapsht dosjen e Hakmarrjes për Drejtësi dhe tani së fundi atë të Aldo Bares.
Berisha evidentoi se Rama ka lidhje me vrasësit e komisarit Lame dhe Shullazin. Berisha tha gjithashtu se i lidhur kokë e këmbë me krimin është dhe Saimir Tahiri. Çdo njëri që studion rastin e Balilit nuk ka asnjë vështirësi të konstatojë se Balili është i mbrojturi i Ramës dhe Tahirit. Ndër të tjera ai kujtoi dhe rastin kur pas heqjes së moratoriumit të skafeve nga qeveria socialiste, Saimir Tahiri ishte i pari që bleu skaf, i cili u përdor nga Habilajt njësoj si siç u përdor makina e tij që kaloi plot 28 herë kufirin. Berisha shprehu gjithashtu shqetësimin se shndërrimi i vendit në Kanabistan është një politikë shtetërore jozyrtare.
Gjatë takimit diskutimi u ndal tek një nga kriteret e listës së kritereve të Kopenhagenit për zgjedhje të lira dhe të ndershme; mediat. Ai shprehu shqetësimin se mediat e mëdha të vendit janë tërësisht të kapura nga Edi Rama dhe bëjnë gjithçka për të censuruar opozitën.
Berisha theksoi se e konsideron situatën emergjente, për ndërhyrje të fuqishme për të shpëtuar zgjedhjet. Një situatë emergjente kërkon masa dhe ndërhyrje emergjente, tha ai. Në këtë kontekst zoti Berisha theksoi se masa më efikase është votimi dixhital, të cilin ai e gjykoi plotësisht të realizueshëm pasi ai nuk fillon nga zero por në kushtet kur baza e të dhënave themelore për votim elektronik ekziston e plotë dhe duhen vetëm pak javë për ta bërë disponibël.
Ai u shpreh se nëse qeveria ka vullnetin atëherë mund të gjendet kompania që të nisi punën për këtë. Berisha bëri të ditur se nëse ndonjë kompani nuk merr përsipër të mbulojë gjithë territorin atëherë Shqipëria mund të ndahet në disa zona dhe bërë të mundur që shqiptarët të votojnë si shumë vende të tjera duke i bërë kështu një shërbim shumë të madh vendit. Ai theksoi se vërtet kjo mund të ketë një kosto më të madhe por kjo kosto është shumë herë më e vogël se një proces zgjedhor i manipuluar dhe i shkatërruar.
