Ish-ministrja e arsimit Besa Shahini, ka fajësuar Vjosa Osmanin, për mënyrën si e ka paraqitur shtetin e Kosovës, në njërën nga mediat më të famshëm në botë, BBC.
Shahini ka thënë se përfaqësuesja më e lartë e vendit, Presidentja e Kosovës, duke aluduar në Vjosa Osmanin, kishte deklaruar për BBC, që problemi më i madh në Kosovë është “korrupsioni”, duke e cilësuar si deklaratë populiste dhe anti-patriotike.“Të flitet për korrupsion në fushatë zgjedhore është e kuptueshme. Por, të përçohet diskursi i fushatës në media ndërkombëtare dhe të përshkruhet Kosova si vend i zhytur në korrupsion, është të pështysh vetën në fytyrë, siç kanë bërë Basha e Meta shpesh me Shqipërinë për interesa vetjake elektorale”, ka shkruar ajo.
Postimi i plotë: “Presidentja e Kosovës – përfaqësuesja më e lartë e vendit – tha për BBC-në, që problemi më i madh në Kosovë është “korrupsioni”. Përveçse e pavërtetë, kjo deklaratë është populiste dhe anti-patriotike.
Problemi kryesor për t’u diskutuar në media ndërkombëtare është fakti se Kosova nuk njihet si shtet nga rajoni, BE-ja dhe organizatat e tjera kryesore ndërkombëtare. Kjo pengon jo vetëm zhvillimin shoqëror dhe ekonomik, por edhe imagjinatën se si mund të dilet nga izolimi dhe pabarazia me vendet e tjera të rajonit.
Kur e para e vendit prezanton gjithë gjeneratat paraardhëse politike si të korruptuara, tingëllon mosbesues edhe cilësimi që ia bën vetes dhe Vetëvendosjës si të “pakorruptueshëm”.
