Besa Shahini sulmon Albin Kurtin pas arrestimit të bashkëshortit: Kryeministri i shuan me dhunë zërat opozitarë

0
420
Zjarr Televizion Ad This is a sample article. ...

Ish-ministrja e Arsimit Besa Shahini ka reaguar pas arrestimit të disa aktivistëve të Partisë Socialdemokrate në Kosovë, mes tyre edhe bashkëshorti i saj, Dardan Molliqaj. Ata penguan konferencën e kryetares së Gjykatës Speciale, Ekaterina Trandafilova.

Në një postim në Facebook ajo sulmon kryeministrin Albin Kurti duke thënë se nevoja e këtij të fundit për të shuar zërin opozitar, ka kaluar në absurditet, ndërsa  shprehet se aktivistët u rrahën dhe u arrestuan dhunshëm.

“Shëndeti i demokracisë në Kosovë është në pikën e vet më të brishtë që nga paslufta. E vetmja fije shprese është fakti që nën pushtetet e dhunshme, pashmangshëm rritet e forcohet opozita. Kështu që paradoksalisht, nevoja dhe hapësira për opozitë të re dhe të zëshme po vjen duke u rritur.”

Postimi i plotë i Besa Shahinit:

Nevoja e Albinit që të shuajë çdo zë opozitar në Kosovë ka kaluar në absurditet. Pesë aktivistët në aksionin simbolik kundër gjykatës së padrejtë speciale – tashmë e shndërruar në gjykatë kundër UÇK-së – u rrahën dhe arrestuan dhunshëm. Në korrik ndodhi e njejta, kur Albini nxorri policinë për të mbrojtur një taksë absurde shtesë të regjistrimit të makinave, të cilën e tërhoqi më vonë.

Para kësaj, u organizua një protestë e vogël kundër hipokrizisë së VV-së e cila bëri fushatë të hapur elektorale, të rrezikshme për shëndetin midis pandemisë dhe menjëherë pasi fitoi zgjedhjet vendosi masa të rrepta duke u thirrur në pandemi, që rezultuan në mbyllje biznesesh dhe gjobitje marramendëse të qytetarëve. Protesta u mbyll me dhunë policore, aq në shpërputhje me aksionin e protestuesve, sa nuk ishte parë që nga koha e UNMIK-ut.

Nëse nuk i shuan me dhunë, Albini nxjerr ministrat e vet në protestë, për ta përvetësuar kauzen, siç ndodhi me daljen e turpshme të ministres së drejtësisë dhe atij të brendshëm në protestat kundër vrasjes brutale të një gruaje të re nga partneri i saj.

Shëndeti i demokracisë në Kosovë është në pikën e vet më të brishtë që nga paslufta. E vetmja fije shprese është fakti që nën pushtetet e dhunshme, pashmangshëm rritet e forcohet opozita. Kështu që paradoksalisht, nevoja dhe hapësira për opozitë të re dhe të zëshme po vjen duke u rritur.

Zjarr Tv Ad