Bushati ironizon rezolutën e PS: Nuk jemi vend dordolec, nuk qërohen kështu hesapet me Bashën

0
9

Komisioni i Jashtëm nisi diskutimet për projekt-rezolutën “Për Ndërhyrjet e Huaja në Proceset Elektorale dhe Dezinformimin në Proceset Demokratike Kombëtare” e njohur ndryshe edhe si rezoluta kundër rrezikut rus.

Kreu i grupit parlamentar të PS, Taulant Balla, gjatë fjalës së tij në komision, tha se vendi ynë nuk mund të jetë imun ndaj dezinformimit, ndaj për këtë arsye është depozituar dhe kjo projektrezolutë që mban të njëjtin emër me atë të Parlamentit Europian.

Por i ashpër ishte reagimi i ish-ministrit të jashtëm socialist, Ditmir Bushati.

Fillimisht ai pyeti nëse kjo inicativë është konsultuar me qeverinë. “Është njësoj sikur të heqim TVSH-në, pa pyetur qeverinëm” tha ai.

“Që në titull kemi një gabim. Kam bërë kërkim dhe asjnë prej parlamenteve europiane nuk ka shkuar në këtë proces. Na duhet informacion nga qeveria se cilat janë vendet e Ballkanit, të cilat e kanë ndërmarrë këtë nismë,” tha Bushati.

“Ne jemi vend trojkë me Italinë dhe Slloveninë për marrjen e OSBE-së. Duhet të dimë edhe qëndrimet e këtyre dy vendeve”, shtoi.

“Por nëse miratojmë këtë rezolutë, e zënë jam Edi Rama kryeministër, çfarë objektivash me keni vendosur në këtë dokument? Çfarë mekanizmash dhe çfarë detyrash me keni dhënë që nuk i kemi bërë deri më sot?”, u shpreh ai.

Ish-ministri tha se në dokument nuk përmendet prania e Shqipërisë në NATO. “Në rast se jemi përballë këtij kërcënimi, çdo dy vjet ministria e Mbrojtjes përditëson një dokument që bëhet në bashkëpunim me NATO-n, në mënyrë periodike rishikohet siguria kombëtare. Pse nuk shkojmë te strategjia e sigurisë kombëtare. Ka një metodologji BE që e mat performancën e këtyre vendeve. Prapë po ju them se ky nuk është rasti”, tha Bushati.

Pasi Balla përmendi akuzat ndaj PD-së dhe Lulzim Bashës për financimet me ndikim rus.

Por Bushati tha se nuk qërohen hesapet me Bashën duke përfshirë aktorë të tjerë.

“Për mua Lulzim Basha nuk ekziston fare. Nuk mund të marrim si referencë Lulzim Bashën. Edhe sikur 10 palë zgjedhje të bëjmë ne do ta mundim Lulzim Bashën. Nuk i qërojmë dot politikisht hesapet me Lulzim Bashën, duke përfshirë aktorë të tjerë”.

“Ky nuk është vend dordolec, është vend anëtar i NATO-s,” tha ish-ministri.

Rezoluta u miratua, por Bushati dha votën kundër.