Ministri i Brendshëm Bledi Çuçi ditën e sotme ka pritur në zyrë homologun e tij kosovar, ministrin e Punëve të Brendshme, Xhelal Sveçla.
Përmes një postimi Çuçi bëri të ditur se gjatë takimit u diskutuan çështje të ndryshme të interesit të përbashkët, si funksionimi i marrëveshjeve kufitare mes dy vendeve, mundësia e rikategorizimit të pikës kufitare të Shishtavecit, si dhe risitë që sjell për shtetasit e Kosovës projektligji i ri për të huajt.
Gjithashtu u fol dhe për lehtësimin e mëtejshëm të lëvizjes së lirë të njerëzve, sidomos atyre që banojnë në brezin kufitar Shqipëri-Kosovë.
“Pata kënaqësinë të prisja sot në një takim zyrtar ministrin e Punëve të Brendshme të Republikës së Kosovës, Xhelal Sveçla, me të cilin diskutova disa çështje të interesit të përbashkët, si funksionimi i marrëveshjeve kufitare mes dy vendeve, mundësia e rikategorizimit të pikës kufitare të Shishtavecit, si dhe risitë që sjell për shtetasit e Kosovës projektligji i ri për të huajt. Po kështu folëm edhe për forcimin e kontrollit të kufijve dhe lehtësimin e mëtejshëm të lëvizjes së lirë të qytetarëve në të dy shtetet, e posaçërisht të atyre që banojnë në zonat e brezit kufitar. Me rëndësi është gjithashtu thellimi i bashkëpunimit policor në luftën kundër krimit të organizuar, kontrabandës dhe trafiqeve në të dyja anët e kufirit, si dhe koordinimi për çështje të tjera që lidhen me procesin e integrimit evropian të dy vendeve tona”, shkruan Çuçi.
