Ish-kryeministri Sali Berisha gjatë konferencës për shtyp nga ‘Rogner’ iu përgjigj deklaratave të sotme të ambasadores së SHBA, Yuri Kim.
Përgjigjja e Berishës për Kim ishte që ‘ambasadorja të vazhdojë të pijë kafe në livadhet e qeverisë’.
“Së pari, më duhet të them se ‘Foltorja’ ka zgjuar shpresa të mëdha në mbarë botën. Unë dua t’ju informoj ju se kjo pritje për Foltoren nuk është më pak entuziaste në vendet mike. Nuk është më i vogël entuziazmi në vendet mike. Nuk janë më të pakëta përgëzimet që marr për këtë nismë shpëtimtare të pluralizmit nga përfaqësues të vendeve mike në Europë dhe nga nivelet më të larta politike të krahut republikan në Amerikë.
Pra për të mbyllur këtë problem, zonjës ambasadore dhe cilitdo tjetër që ka një provë dhe fakt të vetëm, e ftoj t’i dërgojë pranë gjykatës në Paris. Shpreh kënaqësinë time, por edhe mirënjohjen se miq, se përfaqësues të vendeve mike, se personalitete të shquara të elitës politike amerikane, nuk pajtohen, nuk pranojnë, nuk binden, madje e marrin thjesht si një hakmarrje politike se kemi prova dhe nuk i themi.
Kjo ka marrë fund, ke prova, çoji përpara gjykatës.
Mund t’ju them që në të dy anët e Atlantikut, miq të shquar që thonë se kanë parë dosjen, thonë se e kanë gjetur atë sine materia.
Çështja e kafes, le të vazhdojë të pijë kafe në livadhet e qeverisë. Por jam i sigurt që do e afrojmë Shqipërinë më shumë me BE dhe SHBA. Ky është zotimi im”- tha Berisha.
