Banorët e fshatit turistik të Radomirës në Dibër, janë ngritur në protestë për të kundërshtuar ndërtimin e hidrocentraleve në zonë. Banorët kundërshtojnë marrjen e burimeve ujore të fshatit të Radomirës si dhe dëmtimin e tokës ku kërkohet që të ndërtohet linja që do të marrë ujin.
Ata u mblodhën së bashku për të treguar vendosmëri që s’do të lejojnë avancimin e punimeve të firmës, e cila pasi ka ndërtuar një hidrocentral në kufi me Kukësin, kërkon që ta shtrijë investimin drejt fshatit Radomirë për të ndërtuar edhe dy HEC-e të tjera. Banorët i kërkojnë qeverisë që të ndërhyjë dhe të mos lejojë shkatërrimin e fshatit turistik të Radomirës, i cili vitet e fundit ka tërhequr mijëra turist, vendas e të huaj.
Banorët pretendojnë se firma po i kryen punimet në kundërshtim me ligjin pasi sipas tyre, ata nuk janë pyetur dhe nuk është zhvilluar asnjë dëgjesë publike.
“Këtë vatan e kanë mbajtur me luftëra dhe janë vrarë për këtë vend, këta janë futur me forcë. Nuk do marrin ujin tonë”, tha banori.
