Ish-kandidati për kryetar të PD, Fatbardh Kadilli ka deklaruar mbrëmjen e sotme se do të marrë pjesë në të dy kuvendet e PD-së, në atë të datës 11 Dhjetor të thirrur nga Sali Berisha dhe në kuvendin e datës 18 Dhjetor të thirrur nga Lulzim Basha.
Ai u shpreh në “News24” se do të jetë atje për demokratët dhe se nuk mbështet asnjë nga liderët që e kanë organizuar Kuvendet.
Ndër të tjera Kadilli theksoi se dëshiron që PD të jetë e bashkuar dhe të vendoset rregulli që pas çdo humbjeje, të rivendoset një kryetar i ri në drejtimin e partisë.
Pyetje: A do të shkoni në Kuvendin e PD, nëse po në cilin?
Kadilli: PD ndodhet e përçarë, do të ketë dy kuvende. Unë do të jem në të dy Kuvendet, sepse nuk i ndaj dot demokratët, në të Berishës dhe të Bashës. Për shumëkënd mund të duket si i pakuptimtë. Nuk e di. Nuk jam organizatori i asnjërit. S’jam aty për të numëruar delegatët, e për të mbështetur liderët që i kanë thërritur. Unë do shkoj atje për demokratët. Kandidat për ta sjellë PD në krye, për ta bashkuar. Sot e shoh që po ndahet. Duhet t’i them hapur demokratëve që nuk duhet të na përçajnë liderët, por duhet të bashkohemi. Në gjykimin tim, si njëri si tjetri janë lidera që s’i japin gjë partisë. Basha humbi më 25 prill, duhet të kishte ikur.
Pyetje: Mes Bashës e Berishës çfarë do të mbështeteshni?
Kadilli: Asnjërin. Unë e kisha në propozimet e mia kur isha kandidat, që nëse humb zgjedhjet të largohen. Duhet të ketë një limit provash. Nuk është Basha njeriu që ka privilegjin që i ka gjithnjë provat. Kjo është luftë e hapur për pushtetin e opozitës. Kjo na bie në moralin politik. Basha akuzon Berishën dhe Berisha Bashën, ndërkohë ata kanë qenë bashkë.
Pyetje: Cili do të jetë aksioni juaj?
Kadilli: Zgjidhja e vetme për një forcë politike është të bëhet perëndimore, ku partia të jetë e përhershme dhe kryetarët e përkohshëm. Të jenë në provë vetëm për një palë zgjedhje, humbe, shko në shtëpi. Nuk ka pse të rrimë viktima të liderit. Ne duhet të vendosim rregullin që të zgjedhim një drejtues që merr një projekt dhe e çon deri në fund. Një ngjarje e njohur që Basha humbet zgjedhjet ndaj socialistëve dhe Ramës, e njëjta gjë vlen edhe për Berishën. Ca duhet të provojmë, ata që kanë qenë njëherë? Kjo nuk shkon.
