Një ngjarje e rëndë ka ndodhur mbrëmjen e djeshme në qytetin e Korçës, ku një person i pa identifikuar ka qëlluar fillimisht Emiljano Pinen me armë zjarri e më pas ka vrarë dhe veten.
Ngjarja ka ndodhur në lagjen nr 4 të këtij qyteti në afërsi të një hoteli privat. Burime të siguruara nga korrespondenti i Euronews Albania, Xhensil Shkëmbi, thanë se personi i vetëvrarë para e ka qëlluar me 4 plumba Emiljano Pine, i cili ka ndërruar jetë sapo ka mbërritur në spitalin rajonal të Korçës.
Grupi i hetimit ndodhet në vendngjarje për të sqaruar më tej rrethanat. Për këtë janë shoqëruar në polici disa persona të cilët kanë qenë në një lokal në afërsi të vendit të ngjarjes për të dhënë sqarime të mëtejshme.
Njoftimi i policisë:
Më datë 28.02.2024, rreth orës 20:25, në lagjen nr. 18, Korçë, rruga “Koço Golniku”, një shtetas ende i paidentifikuar, dyshohet se ka qëlluar me armë zjarri shtetasin E. P., rreth 40 vjeç, banues në Korçë, i cili ka humbur jetën gjatë transportimit për në spitalin e Korçës.
Autori i dyshuar i krimit, pasi ka qëlluar 40-vjeçarin, dyshohet se është vetëvrarë me armën e krimit.
Shërbimet e Policisë kanë shkuar menjëherë në vendngjarje, ku kanë gjetur dhe sekuestruar në cilësinë e provës armën e krimit, gëzhojat. Gjithashtu janë administruar dhe po këqyren pamjet filmike nga kamerat e sigurisë.
Për këtë rast është krijuar një grup i posaçëm hetimor i cili po punon për zbardhjen dhe dokumentimin e plotë të ngjarjes, si dhe për identifikimin e autorit të ngjarjes.
