Ministri i Brendshëm, Sandër Lleshaj, e ka justifikuar ndërhyrjen e trupave RENEA në Teatrin Kombëtar me zërat që flisnin për vendosje eksplozivi brenda godinës. Në interpelancën e kërkuar nga opozita ministri Lleshaj mbrojti policët që dolën në protestë pa numra identifikimi, duke thënë se emrat e tyre opozita nuk do t’i marrë asnjëherë.
“Për sa i përket RENEA-s, ajo ka qenë te teatri për arsye se ka patur nevojë për kontrollin e godinës për të cilin ishin bërë aludime se do të përdorej forcë, kishte dyshime se do të kishte lëndë eksplozive dhe përpara fillimit të punës për shkatërrimin e godinës RENEA me njësinë e saj antieksploziv ka bërë verifikimin e godinës për të parandaluar rrezikun që mund të përbënte për qytetarët”.
Me këtë argument, të bazuar te zërat dhe jo te informacioni policor, ministri i Brendshëm Sandër Lleshaj, ka justifikuar përfshirjen e forcave speciale RENEA në shembjen e Teatrit Kombëtar.
Në interpelancën e kërkuar nga opozita, Lleshaj u shpreh se në tërësi policia ka mbetur vetëm në përdorimin e shtrëngimit fizik, edhe pse në ligj i jepen më shumë kompetenca.
Lleshaj: Në ligjin për Policinë e Shtetit, neni 133, po e citoj, thuhet kështu: “Punonjësi i policisë përzgjedh nivelin e nevojshëm të forcës ndërmjet mundësive të përshkallëzuara, që, ndër të tjera, përfshijnë bindje me fjalë, shtrëngim fizik, mjete goditëse, mjete me lëndë paralizuese, mjete me goditje elektrike, qen policie dhe armë zjarri”. Këtë njeh ligji aktual i PSH, ashtu si dhe i çdo policie tjetër në botën normale, në kompetencën në autorizime për përshkallzime të forcës për policinë. Pra janë disa shkallë.Dhe po ta shihni policia ka mbetur tek shkalla e parë, të shtrëngimi fizik. Kaq forcë ka ushtruar policia me datën 17 maj si mënyra e vetme për të ushtruar dhe për të plotësuar detyrën e saj.
Dhuna e ushtruar ndaj gazetarëve, për Lleshajn ka një shpjegim.
Lleshaj: Policia, të nderuar deputetë, nuk njeh hierarki në misionin e saj. Nuk njeh askënd, përveçse ligjin. Atë ditë ka pasur dy incidente me 2 përfaqësues të medias të cilët nuk kanë qenë në ushtrim të detyrës së tyre, si përfaqësues të medias, por kanë ndërhyrë dhe kanë penguar me dorë, fizikisht punonjëset femra të policisë, gjatë kryerjes së detyrës. Dhe e dini që pengimi i punonjësit të policisë për kryerjen dhe ushtrimin e përgjegjësisë ligjore përbën vepër penale. Dhe këtë të drejtë nuk e ka as media, as ministri.
Opozitarët kërkuan shpjegime për mosidentifikimin e policëve gjatë ndërhyrjes ndërsa Ministri, solli në vëmendje protestat në SHBA.
Lleshaj: Pse kërkoni tu vëmë targë gjithë njerëzve, si mund tu vëmë targë. Nuk është standard i përbotshëm numri i identitetit të policisë.Numri i identitetit vendoset kur punonjësi i policisë shkon në patrullë individualisht, kur shkon në fshat, kur del në rrugë që ti të kesh mundësi ta identifikosh.E theksoj se nuk është standard i detyrueshëm në kontekstin ndërkombëtar.
Ministri nuk pati një përgjigje për pyetjen e opozitës nëse Bashkia ka vënë në dispozicion dokumentacionin për marrjen në pronësi të truallit të Teatrit Kombëtar.
