Pritja merr fund! Erkand Qerimaj është fituesi i medaljes së bronztë në Kampionatin Botëror të Peshëngritjes, i zhvilluar në muajin dhjetor në Shtetet e Bashkuara të Amerikës.
Edhe pse u pozicionua i katërti në garë, peshëngritësi shqiptar përfitoi nga përjashtimi i kundërshtarit Dimitru Kaptaru. Rumuni rezultoi pozitiv në testin anti-doping pas analizave të bëra pas garës.
Lajmi i marrjes së medaljes është konfirmuar nga vetë peshëngritësi shkodran në rrjetin social “Facebook”. Ndërkohë në një konferencë për shtyp të zhvilluar pak orë pas atij postimi Masllavica dhe Qerimaj u shprehen.
“Në radhë të parë falenderoj Erkandin për këtë medalje shumë të rëndësishme për momentin që jemi ne. Nga një krizë shumë madhe që kishim si Federatë tani ka ardhur një medalje e rëndësishme.”-tha presidenti i Federatës së Peshëngritjes, Theodhor Masllavica.
“Është një kënaqësi e madhe të jem në vendin e tretë në botë. Është rezultati më i lartë i karrierës sime. Shpresoj që edhe në kampionatin që zhvillohet në Gjeorgji, kampionati Europian shpresoj që të rikthehemi me medalje dhe të ngrejmë lart flamurin shqiptar. -komentoi Qerimaj.
