Premtimet e bëra nga Kryeministri Rama, për strehimin e të gjithë familjeve që humbën shtëpinë nga fatkeqësia natyrore e 26 Nëntorit të vitit 2019, janë hedhur poshtë nga dëshmitë e banorëve të bashkisë Dimal, që ende jetojnë në çadra.
Pa mbështetje dhe pa shpresë se do të kenë një çati mbi kokë, familja Totaj në fshatin Poshnje e intervistuar nga SYRI TV, bën apel për ndihmë që edhe ata të kenë kushtet minimale për të jetuar. Me një shtëpi të dëmtuar e shkatërruar tërësisht nga tërmeti, familja e Reshat Totajt, e cila jeton në fshatin Poshnje të bashkisë Dimal, apelon për ndihmë.
Banesa e tyre e cila u dëmtua fillimisht nga tërmeti i vitit 2017, më pas nga tërmeti i shtatorit 2019 dhe tërmeti i 26 nëntorit i dha goditjen e fundit shtëpisë duke e kthyer në gërmadhë dhe duke e bërë të pabanueshme. Kryefamiljari shprehet se pas rrënimit të banesës, një komision verifikimi i bashkisë Dimal ka ardhur në këtë zonë, ku pasi bëri verifikimin e dëmeve doli në konkluzionin se banesa e familjes Totaj është e pabanueshme.
Komisioni bëri asokohe edhe vlerësimin e dëmit në shumën e rreth 1,4 milionë lekëve, lekë që familja nuk i ka marrë as sot e kësaj dite. Kryefamiljari Reshat Totaj shprehet se që nga tërmeti i vitit 2017 dhe deri në ditët e sotme, familja e tij jeton prej 4-vitesh në çadër, ndërsa kur bie shi ata futen në shtëpinë gërmadhë, duke rriskuar edhe jetën.
Familja e Rreshat Totaj e cila banon në fshatin Poshnje të bashkisë Dimal përbëhet prej 7 pjesëtarësh,ku më i vogli është 6-vjeç dhe më i madhi, Nëna 69-vjeçare. Ata apelojnë për ndihmë nga instancat shtetërore pasi prej 4 vitesh janë lënë në mëshirë të fatit.
