Deputeti Ferdinand Xhaferraj, teksa ka folur për situatën në të cilën ndodhet Partia Demokratike, ka renditur arsyet përse Sali Berisha nuk duhet të kandidojë për t’u bërë kryetar i PD-së.
Sipas tij, arsyeja e parë është se Berisha prish barazinë e garës për shkak të mbështetjes së madhe që ka, ndërsa arsyeja e dytë është se kërkesa e Berishës bëhet për axhendën e tij personale, për mos-ndëshkueshmëri.
“Kemi punuar me Berishën, nuk ndihemi mirë me atë që ka ndodhur. Ajo që do them nuk ka të bëjë me personin, por për interesin e anëtarësisë së PD, pra është parimore. Pse Berisha nuk duhet të pretendojë të kandidojë për PD-në? E para, prish barazinë e garës. I gjithë potenciali i tij, e pranojnë të gjithë që po kandidoi do fitojë brenda këtij mjedisi.
Po interesi i këtij mjedisi nuk është të bëjë Berishën fitimtar, ne duhet të fitojmë zgjedhjet. Arsyeja e dytë, shumë e përdorin këtë zgjatjen e mandateve për mos-ndëshkueshmëri.
Këtë thonë studiuesit. Kërkesa e Berishës bëhet për axhendë personale apo për t’i shërbyer demokratëve. Ai në 2013 dha dorëheqjen se e pa që nuk i jepte më dot fitoren asaj partie,” tha Xhaferaj.
