Prokurorët e Prokurorisë së Posaçme, duken të vendosur për të mos toleruar askënd. Analisti Frrok Çupi, shprehet se fajtorët e mëdhenj kanë nisur të thërrasin dhe të tregojnë shokët. Sipas tij, SPAK ka rihapur dosjet e bujshme që do të çojnë në shumë arrestime. Ai shkruan se “Ilir Meta, që këto ditë është President i Republikës, ka treguar Sali Berishën- ish president. Ai ka thënë se ka një “video të të birit Shkëlzeni, ku dëshmohen akte të rënda”.
Çupi: “S’e kishim pas kuptuar mesazhin e tyre të koduar, edhe pse këta e përsëriten ngakirmi. Duke i trembur njerëzit normalë të ‘polisit’, këta në fakt kishin paralajmëruar fatin e tyre të fundit. A nuk u vjen ndërmend slogani luftarak: ‘Eja mblidhuni këtu- këtu, bashkë me ne!? Drejtimin e dytë të parullës ‘Eja mblidhuni bashkë me ne…’, këta e kishin për ditën e fundit, që në fakt ka mbërritur. Ditën e fundit, shefat më të zgjuar do të merrnin rolin e ‘të penduarit’ para Drejtësisë. Këta do t’i kallëzonin dhe do t’i dorëzonin shokët për në derën e Drejtësisë. Ja, kjo po ndodh, gjyqi ka nisur. Që në momentin kur Departamenti i Shtetit e shpalli ‘non-grata’ shefin më të lartë të kirmeve 30 vjeçare, zotin Berisha, që në atë çast këtu ka nisur gjyqi. Që ditën kur presidenti Meta ka ‘humbur’ gruan dhe kjo nuk bëhet më e gjallë në egërsinë e saj kundër paqes sonë, që atë ditë gjyqi është hapur; ajo do të nisë dëshminë ndaj burrit. Gjyqi për Gërdecin është hapur, Gjyqi është hapur për 21 Janarin, është hapur për eleminimin e bankierit Santo, është gati për aferën comorriane të CEZ… Tani dëgjohet kudo oshtima: ‘Eja mblidhuni këtu këtu…’. Fajtorët e mëdhenj kanë nisur të thërrasin dhe të tregojnë shokët.
Ka nisur të flasë roja i thesit të parave. Roja ishte rang i lartë, nuk ishte një mustaqe- spic me pushkë në krah si në Mesjetë. Këta kishin roje personale Prokurorin e Përgjithshëm të Republikës. Ai që ruante ‘kullën e floririt’, tani ka hyrë i pari në qeli për të mbajtur hapur derën për shokët. ‘Unë e dija se Berisha do të burgosej’, deklaroi prokurori Llalla. Ja edhe biseda e rojës në qeli:
Gazetari: ‘A ju është kërkuar konkretisht me emër të arrestohet Sali Berisha?’ Llalla: ‘Po, më është kërkuar që të arrestohet, kërkesa më është bërë nga ambasadorja e BE-së. Po pse nuk e arrestoi? Këtu ka ngecur ligji dhe shteti. Nëse do të ishte prapë prokuror Llalla, Berisha dhe Meta do të ishin duke lulëzuar në krim. Por ky tashmë ndodhet prapa derës së burgut dhe tregon shokët. Deri atëherë kishte ruajtur besnikërisht aferat korruptive me miliona të vjedhura dhe të rrënuara nëpër katakombet e tmerreve të 30 vjetëve, ndërsa tani i është kthyer misionit tjetër.Kanë nisur të flasin të zhdukurit: A flasin të zhdukurit?
Kur nuk i futën të gjithë në një thes dhe thesin ta hidhnin në det!…, këta fajin e kishin vetë. Sepse disa u zhdukën, që nga miq të tyre zyrtarë të lartë, ministra, shef i SHIK, etj., deri te Remzi Hoxha- kundërshtar. Përderisa nuk e bënë mbytjen me thes, atëherë disa mbijetuan mbi ujëra, sigurisht. Ata tani janë të gjallë dhe po dëshmojnë. Që nga Britania e Madhe po dëshmon agjenti i SHIK, Kumbaro që mori pjesë në zhdukjen e Remziut. Nga Tirana- Sefgjini. Nga Suedia dëshmon motra e Haklaj. Nga Brukseli dëshmon gazetari i plagosur në 21 Janar, Fatos Mahmutaj. Edhe një grua që ishte martuar në familjen e kallëzuar nga Amerika dhe që jeton ‘e mërzitur’ diku në Nord, ajo ka shumë për të treguar… Shqipëria u kthye edhe një herë në epokën e ‘arratisjeve’ si në diktaturë, por këto 30 vjet arratisja u krye për shkak të dëshmive. Këta shefa të mëdhenj i kishim menduar ‘të zhdukur’ dëshmitarët e tyre, por ata atëherë kur u mbytën mbetën mbi ujëra dhe notuan të gjallë drejt Perëndimit. Tani po i tregojnë shokët.
