Organizata Botërore e Shëndetësisë është vendosur në qendër të akuzave për keq menaxhimin e gjendjes së pandemisë së koronavirusit. Kritikët thonë se organizata nuk e njoftoi botën në kohë dhe dha deklarata kontradiktore në lidhje me transmetimin e virusit tek njeriu apo kufizimin e udhëtimeve ndërkombëtare, duke ndjekur përgjithësisht linjën e Kinës.
Ndërprerja e financimeve të Shteteve të Bashkuara ndaj Organizatës Botërore të Shëndetësisë ka rindezur debatin për menaxhimin që kjo organizatë i bëri gjendjes së krijuar nga shpërthimi i koroanvirusit në mbarë botën.
Presidenti amerikan Donald Trump drejtoi gishtin nga organizata dhe kujtoi deklaratat e fillim janarit kur OBSh-ja tha se nuk kishte prova të mjaftueshme se virusi mund të transmetohet nga njeriu tek njeriu. Një qëndrim i tillë i OBSh-së u bë pavarësisht paralajmërimeve nga autoritetet e Tajvanit për persona të infektuar në Kinën Kontinentale.
Më 14 janar Maria Van Kerkhove, eksperte për zhvillimin e sëmundjeve pranë OBSh-së, tha se studiuesit po përpiqeshin të gjenin mënyrat e transmetimit të virusit. Në fillim të janarit, sëmundja njihej vetëm përmes një grupi rastesh pneumonia atipike, ose pneumoni me origjinë të panjohur.
“Çdo vit në mbarë botë ka miliona e miliona raste të pneumonisë atipike,” u justifikua Dr. Mike Ryan, nga Programi i Emergjencave Shëndetësore i OBSh-së, duke shtuar në mes të sezonit të gripit, ishte “mjaft i jashtëzakonshëm” konfirmimi i 41 rasteve të veçuara në Wuhan të Kinës.
“Virusi u identifikua më 7 janar dhe sekuenca gjenetike e tij u nda për të gjithë botën më 12 janar,” shton Ryan. Por OBSh-ja akuzohet se ka ndjekur linjën e Kinës që u përpoq fillimisht ta fshehë epideminë, duke rrezikuar pjesën tjetër të botës.
Pavarësisht gjendjes së vështirë të krijuar në Wuhan të Kinës dhe përhapjes së virusit në Azinë Lindore e Juglindore, më 29 shkurt Organizata Botërore e Shëndetësisë u shpreh kundër kufizimit të udhëtimeve ndërkombëtare me avion si dhe kundër vendosjes së kufizimeve tregtare. Kjo solli që mijëra kinezë të udhëtojnë së pari jashtë Wuhan-it dhe më pas në të gjithë botën.
Vetëm pasi virusi filloi të shpërndahej me shpejtësi në Europë, më 11 mars Organizata Botërore e Shëndetësisë e shpalli Covid-19 pandemi botërore, rreth dy muaj pas shfaqjes së rasteve në Kinë.
Kufizimet e lëvizjes së qytetarëve në Europë filluan të vendosen nga mesi i marsit, kufizime që duke i parë nga sot duken të vonuara.
