Çdo 10 ditë, përgjatë muajve të parë të vitit 2019, i është marrë jeta një gruaje në vendin tonë. 7 gra të vrara nga bashkëshortët apo familjarët. Me të tilla të dhëna e gjen 8 Marsi Shqipërinë, ku gratë dhe vajzat vijojnë të mos ta kenë të nesërmen të sigurt. Mjaft prej meshkujve shprehen se partneret e tyre nuk i gëzojnë të gjitha të drejtat dhe se janë ata që i vendosin pikat mbi “i”.
“Nuk respektohen siç duhet”
114 raste të dhunës në familje janë shqyrtuar në gjykatë nga 1 janari deri më 8 mars, nga të cilat 51 janë me vendime fajësie. Ndërkohë gjatë kësaj periudhe janë lëshuar 34 urdhra mbrojtje. Ky fenomen i kalon kufijtë dhe sipas një raporti të fundit të OSBE janë afro 16 milionë gra dhe vajza që kanë përjetuar një formë të dhunës. Në këtë raport Shqipëria renditet e dyta, pas Moldavisë. Pavarësisht këtyre të dhënave, ashtu siç edhe tradita e do, këtë 8 Mars nuk mungoi festa dhe dhurata për gratë dhe vajzat. Më 1910 Konferenca Ndërkombëtare e Gruas vendosi datën 8 Mars si dita e grave dhe vajzat, ditë në të cilën përkujtohen gjithë përpjekjet që janë bërë ndër vite që gratë të kenë më shumë të drejta në familje, punë dhe shoqëri.
