Komisioni i Pavarur i Kualifikimit ka bërë me dije vendimin për konfirmimin në detyrë të gjyqtares së Gjykatës së Durrësit Nurjeta Pogaçe.
Pogaçe (Tafa) u përball të hënën më 31 tetor me gjetjet e Komisionit të Pavarur të Kualifikimit, KPK në të tre kriteret e rivlerësimit, për të cilat dha shpjegime në mënyrë të përmbledhur gjatë seancës dëgjimore.
Komisioni nuk gjeti probleme në tre dosjet e përzgjedhura nga subjekti në funksion të rivlerësimit profesional dhe as në ato pesë të shortuara.
Ndërkohë, u analizuan 11 denoncime nga publiku të mbërritura në KPK dhe pesë pranë Operacionit ndërkombëtar të Monitorimit, për të cilat i janë kërkuar shpjegime për gjashtë çështje.
Gjyqtarja Pogaçe i cilësoi të pabazuara të gjithë pretendimet e ngritura në gjashtë denoncimet për të cilat i janë kërkuar shpjegime.
Në përfiundim, gjyqtarja Nurjeta Pogaçe(Tafa) u shpreh se vlerësonte se kishte arritur nivel të besueshëm në të tre kriteret e rivlerësimit dhe kërkoi konfirmimin e saj në detyrë.
Gjyqtarja Nurjeta Pogaçe përfundoi studimet në Shkollën e Magjistraturës dhe stazhin në Gjykatën Tiranës. Ajo u emërua në vitin 2015 në Gjykatën e Durrësit, ku dhe vijon ta ushtrojë detyrën.
