Ish-nënkryetari i FRPD, Indrit Hoxha, komentoi në Syri Tv këtë pasdite zhvillimet në Partinë Demokratike.
Hoxha tha se në selinë e PD po punohet për t’i kthyer normalitetin godinës e cila ishte blinduar nga Lulzim Basha. Hoxha shtoi se selia blu i është kthyer demokratëve ndërsa theksoi se i vetmi kusht që s’mund të negociohet për bashkimin e PD është vota.
“Dera është e hapur për çdo kontributor të Partisë Demokratike. I vetmi kusht i panegociueshëm në bashkimin e PD do të jetë vota.
Kjo do të burojë nga anëtarësia, proceset për zgjedhjen e strukturave të reja drejtuese të Partisë Demokratike.”-deklaroi Hoxha.
Për deklaratën e Flamur Nokës i cili tha se PD do jetë e hapur për të gjithë, përfshirë dhe Bashën, Indrit Hoxha shtoi se ai do të vazhdojë të mbetet zoti Brava.
“E kam ftuar që të futet në garë për kryetar të PD, për të kuptuar edhe ai realitetin dhe forcën që ka brenda PD. S’e kemi luksin për të humbur asnjë demokrat, qoftë dhe Basha, pavarësisht gjithë gabimeve që ka bërë.”-tha Hoxha.
Ish-nënkryetari i FRPD është i mendimit se Lulzim Basha ka të drejtën të garojë për kreun e PD dhe të drejtën statutore të krijojë fraksion brenda PD.
“T’i përmbahet çdokush statutit të 11 dhjetorit dhe të luhet sipas rregullave.”-tha Hoxha.
Sakaq, Hoxha tha se qeveria e Edi Ramës është më e korruptuara që ka pasur ndonjëherë Shqipëria dhe detyra e PD është t’i kthejë besimin qytetarëve.
“Shqiptarëve ju kishte humbur besimi në PD. Në 9 vite janë lënë në rrugë dhe s’kishin besim. Sfida më e madhe e PD t’i kthejë besimin qytetarëve. Faji kryesor bie mbi lidershipin e PD, të gjithë jemi nga pak fajtorë.”-tha Hoxha.
Ndër të tjera Indrit Hoxha tha se hapi i parë për bashkimin e demokratëve është Kuvendi i 30 prillit.
“Të vijë çdokush që ka kontribuar. Mendimi ndryshe e shëndosh këtë forcë politike, të jemi të gjithë bashkë dhe të lëmë hatërmbetjet. Kemi një betejë përpara, përmbysja e regjimit të Edi Ramës.”-tha Hoxha.
