Pamje apokaliptike ka lënë pas uragani “Ian”, pasi ka përshkuar Floridën në Shtetet e Bashkuara. Dëmet e shkaktuara nga përmbytjet janë të mëdha, shërbimet e emergjencës të ngarkuara dhe bilanci i vdekjes që do të kërkojë kohë për t’u përcaktuar. Presidenti Joe Biden i druhet më të keqes.
“Uragani zbarkoi të mërkurën dhe po vazhdon rrugëtimin e tij edhe sot. Kjo mund të jetë stuhia më fatale në historinë e Floridës. Shifrat janë të paqarta, por ne po marrim informacion të vazhdueshëm mbi humbjen e jetës”, tha presidenti Biden.
Pa përmendur data, Biden ka njoftuar se do të vizitojë Floridën dhe Puerto Rikon. Gjatë ditës së enjte, disa mijëra persona janë evakuuar nga shtëpitë e kujdesit dhe spitalet.
Mbi 2.5 milionë njerëz kanë mbetur pa energji, mijëra të tjerë kanë mbetur të bllokuar në banesat e tyre dhe shumë rrugë janë të pakalueshme.
Qeveria ka premtuar asistencë individuale për personat që kanë humbur shtëpitë dhe që sigurimi nuk u mbulon gjithçka.
