Mëngjesin e sotëm ka nisur sërish aksioni për shembjen e banesave që kanë mbetur ende në zonën e “5 Majit”.
Prej kohësh, banorët atje kundërshtojnë prishjen e shtëpive edhe pse rreth dy javë më parë u shembën nga IMT banesat e para dhe u hasën me kundërshtime dhe përplasje të shumta nga qytetarët.
Banorëve të “5 Majit” në njësinë numër 4 dhe 8 do tu shemben sot banesat. Gratë e “5 Majit” janë kapur dorë përdore dhe kanë thurur një kordon për mos lejuar policinë të kalojë, ku ka pasur edhe përplasje të fortë mes tyre, ndërsa burrat kanë hipur në tarracat e banesave që janë në projekt për tu shembur.
Kujtojmë që Bashkia e Tiranës më parë ka sqaruar se pjesa e banorëve që preken nga projekti i lagjes së re po nënshkruajnë kontratat me Bashkinë e Tiranës. VKM e miratuar në shtator 2021, thotë shprehimisht se këta banorë kompensohen 100% me shtëpi në pallatet e reja, me të njëjtën sipërfaqe në metra katrorë të banesës që zotërojnë aktualisht.